ئىستانبۇلدىكى ئىسرائىلىيە كونسۇلخانىسى يېنىدا ئۈچ تېررورچى بىر تەرەپ قىلىندى

تۈركىيە جۇمھۇرىيىتى ئىچكى ئىشلار مىنىستىرى سەيشەنبە كۈنى بايانات ئېلان قىلىپ، ئىستانبۇلنىڭ بەشىكتاش رايونىدىكى ئىسرائىلىيە كونسۇلخانىسى يېنىدا يۈز بەرگەن قوراللىق توقۇنۇشتا قوراللىق ئۈچ گۇماندارنىڭ بىر تەرەپ قىلىنغانلىقىنى، ئىككى ساقچى خادىمىنىڭ يارىلانغانلىقىنى ئۇقتۇردى.

ئىچكى ئىشلار مىنىستىرى مۇستافا چىفتچى گۇماندارلارنىڭ «ياپى كىرەدى پىلازا» (Yapı Kredi Plaza) ئالدىدا ساقچىلارغا ئوق چىقارغاندىن كېيىن يۈز بەرگەن سۈركىلىشتە ئۈچ ھۇجۇمچىنىڭ «بىر تەرەپ قىلىنغانلىقى»نى ئېيتتى. يارىلانغان ساقچىلارنىڭ  يارىلىنىش ئەھۋالىنىڭ يېنىك ئىكەنلىكى بىلدۈرۈلدى.

ئەدلىيە مىنىستىرى ئاقىن گۈرلەك بولسا، مەزكۇر رايوندىن ئاڭلانغان ئوق ئاۋازى مەلۇماتلىرىدىن كېيىن، تەپتىشلەرنىڭ دەرھال تەكشۈرۈش باشلىغانلىقىنى، بىر باش تەپتىش ۋەكىلى بىلەن ئىككى تەپتىشنىڭ ۋەقە يۈز بەرگەن جايغا ئەۋەتىلگەنلىكىنى ئاشكارىلىدى.

ئىستانبۇل ۋالىيسى داۋۇت گۈل كونسۇلخانىنىڭ پىلازا ئىچىدە ئىكەنلىكىنى ۋە يېقىنقى ئىككى يېرىم يىلدىن بېرى تاقاق ئىكەنلىكىنى بىلدۈردى.

گۇماندارلارنىڭ كىملىكى ئېنىقلاندى، ئالاقە دائىرىسى تەكشۈرۈلمەكتە

دائىرىلەر گۇماندارلارنىڭ ئىجارىگە ئېلىنغان بىر ئاپتوموبىل بىلەن ئىزمىتتىن ئىستانبۇلغا كەلگەنلىكىنى ئاشكارىلىدى. گۇماندارلارنىڭ بىرىنىڭ دىننى سۇيىئىستېمال قىلىدىغان بىر گۇرۇپپا بىلەن ئالاقىسى بارلىقى، يەنە بىرىنىڭ (گۇماندارلار ئارىسىدىكى ئىككى قېرىنداشنىڭ بىرى) ئىلگىرى زەھەرلىك چېكىملىك جىنايىتى  سادىر قىلىشتەك جىنايەت خاتىرىسى بارلىقى ئېنىقلاندى.

دائىرىلەر تەكشۈرۈشنىڭ خەۋپسىزلىك ئورگانلىرى بىلەن ماس قەدەمدە داۋاملىشىۋاتقانلىقىنى، ھۇجۇمنىڭ كۆلىمى ۋە ئېھتىماللىق بولغان سەۋەبلىرىنى ئاشكارىلاشقا ئەھمىيەت بېرىلىۋاتقانلىقىنى خەۋەر قىلدى.