ئامېرىكا كېڭەش پالاتا ئەزاسى بېرنى ساندېرس CNN تېلېۋىزىيەسىنىڭ زىيارىتىنى قوبۇل قىلغاندا، 3-نويابىردىكى ئوتتۇرا مەزگىللىك سايلامدا غەلىبە قىلغان دېموكراتلار پارتىيەسىنىڭ كەلگۈسىدە يۈرگۈزۈشكە تېگىشلىك سىياسەتلىرى ئۈستىدە توختالدى.
ئۇ ئامېرىكانىڭ 28-فېۋرالدىن بۇيان ئىرانغا قارشى قوزغىغان ئۇرۇشى توغرىسىدا توختىلىپ مۇنداق دېدى: «دېموكراتلار قىلالايدىغان ئەڭ مۇھىم ئىش — بۇ ئۇرۇشنى توختىتىش. بىز بۇنى پەقەتلا قارار لايىھەلىرىنى ماقۇللاش بىلەن ئەمەس، بەلكى ئۇرۇشقا ئاجرىتىلغان مەبلەغنى ئۈزۈپ تاشلاش ئارقىلىقلا ئەمەلگە ئاشۇرالايمىز.»
ساندېرس سۆزىدە يەنە: «بۇ ئۇرۇش ھەم قانۇنسىز ھەم ئاساسىي قانۇنغا پۈتۈنلەي خىلاپ» دېدى. ئۇ بۇ قېتىملىق ئۇرۇشتا 19 نەپەر ئامېرىكا ئەسكىرىنىڭ جېنىدىن ئايرىلغانلىقىنى، شۇنداقلا ئىران ۋە ئۇنىڭ قوشنا دۆلەتلىرىدىمۇ مىڭلىغان بىگۇناھ ئەر-ئايال ۋە گۆدەكلەرنىڭ ھاياتىدىن ئايرىلغانلىقىنى تىلغا ئالدى.
ئۇ ئاخىرىدا، مەزكۇر ئۇرۇشنىڭ ئامېرىكاغا يۈز مىلياردلارچە دوللار ئىقتىسادىي زىيان ئېلىپ كەلگەنلىكىنى، شۇنىڭ بىلەن بىرگە بېنزىن ۋە باشقا كۈندىلىك تۇرمۇش لازىمەتلىكلىرى باھاسىنىڭمۇ شىددەت بىلەن ئۆرلەپ كېتىشىگە سەۋەب بولغانلىقىنى ئالاھىدە قەيت قىلدى.
