تاشقى ئىشلار مىنىستىرى خاقان فىدان بانگلادىشتىكى ئۇچرىشىشلىرى توغرىسىدا بەرگەن باياناتىدا: «دۆلەتلىرىمىز ئوتتۇرىسىدىكى مۇناسىۋەتلەر، قېرىنداشلىق رىشتىلىرىمىز ئۇيغۇن رەۋىشتە، ئىنتايىن پۇختا ئاساسلار ئۈستىدە يۈكسەلگەن دۇر» دېدى.
مىنىستىر فىدان ئۆزىنىڭ ئىجتىمائىي تاراتقۇ ھېسابىدا ئېلان قىلغان باياناتىدا، بانگلادىشنىڭ فېۋرال ئېيىدا ئېلىپ بېرىلغان سايلاملاردىن كېيىن يېڭى بىر دەۋرگە قەدەم قويغانلىقىنى ئەسكەرتىپ، دۆلەتنىڭ تىنچلىقى، پاراۋانلىقى ۋە مۇقىملىقى ئۈچۈن ئوتتۇرىغا قويۇلۇۋاتقان تىرىشچانلىقلارغا نەق مەيداندا گۇۋاھ بولغانلىقلىرىنى ئىپادىلىدى.
مىنىستىر فىدان مەنسەپدىشى (بانگلادىش تاشقى ئىشلار مىنىستىرى) دوكتور خېلىلۇر راخمان بىلەن ئۆتكۈزگەن ئۇچرىشىشىدا، ئۆزئارا مۇناسىۋەتلەرنى بارلىق ساھەلەردە تەرەققىي قىلدۇرۇش ئىرادىسىنى قايتىدىن جەزملەشتۈرگەنلىكلىرىنى تەكىتلەپ مۇنداق دېدى:
«ئاسىيا-تىنچ ئوكيان زىيارەت مۇساپىمىزنىڭ تۆتىنچى ھەم ئاخىرقى بېكىتى بولغان بانگلادىشتا، باش مىنىستىر تارىق راخمان تەرىپىدىن قوبۇل قىلىندۇق ۋە تاشقى ئىشلار مىنىستىرى دوكتور خېلىلۇر راخمان بىلەن ئەتراپلىق سۆھبەتلەرنى ئېلىپ باردۇق. زىيارىتىمىز جەريانىدا، فېۋرال ئېيىدا ئۆتكۈزۈلگەن سايلاملاردىن كېيىن يېڭى بىر باسقۇچقا قەدەم قويغان بانگلادىشنىڭ كۈچلۈك يوشۇرۇن كۈچىگە ھەمدە بانگلادىشلىق قېرىنداشلىرىمىزنىڭ تىنچلىق، پاراۋانلىق ۋە مۇقىملىق ئىچىدە ياشىشى ئۈچۈن ئوتتۇرىغا قويۇلغان غايەت زور تىرىشچانلىقلارغا گۇۋاھ بولدۇق.
بانگلادىشلىق قېرىنداشلىرىمىزنى داۋاملىق قوللايمىز
دۆلەتلىرىمىز ئوتتۇرىسىدىكى مۇناسىۋەتلەرنىڭ، ئۆزئارا قېرىنداشلىق رىشتىلىمىزگە ماس ھالدا، ئىنتايىن پۇختا ئاساسلار ئۈستىدە يۈكسىلىۋاتقانلىقىنى كۆردۇق. ئالدىمىزدىكى مەزگىلدە ھەمكارلىقىمىزنى بارلىق ساھەلەردە تەرەققىي قىلدۇرۇشقا قەتئىي بەل باغلىدۇق ۋە بانگلادىشلىق قېرىنداشلىرىمىزنى قوللاشنى ئەنە شۇنداق كۈچلۈك ئىرادە بىلەن ئىزچىل داۋاملاشتۇرىمىز.
كۆرسەتكەن قىزغىن مېھماندوستلۇقى ئۈچۈن، قىممەتلىك قېرىندىشىم دوكتور خېلىلۇر راخمان قاتارلىق پۈتكۈل بانگلادىش دائىرىلىرىگە ۋە خەلقىگە چىن قەلبىمدىن رەھمەت ئېيتىمەن. بۇ پۇرسەتتىن پايدىلىنىپ، يېقىنقى كۈنلەردە بىرلەشكەن دۆلەتلىرى تەشكىلاتى 81-نۆۋەتلىك باش ئومۇممىي كېڭىشى رەئىسلىك ۋەزىپىسىگە تاللانغان قىممەتلىك سەپدىشىمنى يەنە بىر قېتىم قىزغىن تەبرىكلەيمەن. بۇ مۇھىم ۋەزىپىنى غايەت زور ئۇتۇق بىلەن ئادا قىلىدىغانلىقىغا تولۇق ئىشىنىمىز.
زىيارىتىمىز دائىرىسىدە، كوكىس بازاردىكى پاناھلانغۇچلار لاگېرلىرىنىمۇ كۆزدىن كەچۈرۈش پۇرسىتىگە ئىگە بولدۇق. بانگلادىش دۆلىتى بىر مىليوندىن ئارتۇق روھىڭيا مۇسۇلمانلىرىنى ئۆز قوينىغا ئېلىپ، چوڭ بىر ئىنسانىي مەسئۇلىيەتنى جايىدا ئادا قىلماقتا. ئورتاق نىشانىمىز، روھىڭيا كىرىزىسىگە دائىملىق ۋە ئادىل بىر ھەل قىلىش چارىسىنىڭ تېپىلىشىدۇر. كوكىس بازاردا سەھىيە مىنىستىرلىقىمىز، تىكا (TİKA)، تۈرك قىزىل ئاي جەمئىيىتى، تۈركىيە دىيانەت ۋەقىپى ۋە باشقا ئورگانلىرىمىزنىڭ ئېلىپ بېرىۋاتقان خىزمەتلىرىنى نەق مەيداندا كۆردۇق. «تۈركىيە-بانگلادىش ئىنسانىي ياردەم دوختۇرخانىسى» دا ۋەزىپە ئۆتەۋاتقان سەھىيە خادىملىرىمىز بىلەن بىر يەرگە جەم بولدۇق.
مۇشۇنداق قىيىن شارائىتلاردا ۋەزىپە ئۆتەۋاتقان بارلىق خادىملىرىمىزنىڭ كۆرسەتكەن پىداكارلىقلىرى، ئۆزىنى بېغىشلاشلىرى ۋە ئىنسانىيەتكە خىزمەت قىلىدىغان ئۈلگىلىك تىرىشچانلىقلىرى ئۈچۈن ئەڭ سەمىمىي مىننەتدارلىقىمىزنى سۇنىمىز. تۈركىيە بىلەن بانگلادىش ئوتتۇرىسىدىكى دوستلۇق، پەقەتلا ئۆزئارا مەنپەئەت خاراكتېرىدىن تاشقىرى، ئەڭ قىيىن كۈنلەردە بىر-بىرىگە ھەمدەم بولغان ئىككى مىللەتنىڭ ھەقىقىي دوستلۇقىدۇر. بىز بۇ رىشتىنى تېخىمۇ كۈچەيتىشنى ئىزچىل داۋاملاشتۇرىمىز.
