شىمالىي كورېيە دۆلەتلىك تاراتقۇسى KCNA نىڭ خەۋەر قىلىشىچە، شىمالىي كورېيە رەھبىرى كىم جۇڭئۇن ۋە خىتاي دۆلەت رەئىسى شى جىنپىڭ، شىمالىي كورېيەنىڭ پايتەختى پيوڭياڭدا بىر يىغىن ئۆتكۈزگەن ۋە ئىككى دۆلەت ئوتتۇرىسىدا تۈرلۈك ساھەلەردە ھەمكارلىقنى كېڭەيتىش قارارى ئالغان.
KCNA سەيشەنبە كۈنى ئېلان قىلغان خەۋىرىدە، رەھبەرلەرنىڭ ئۆزئارا مۇناسىۋەتلەرنى يېڭى بىر باسقۇچقا كۆتۈرۈش مەسىلىسىدە پىكىر بىرلىكى ھاسىل قىلغانلىقىنى بىلدۈردى.
KCNA نىڭ يەتكۈزۈشىچە كىم جۇڭئۇن شى جىنپىڭغا، خەلقئارالىق ۋەزىيەت قانداقلا ئۆزگەرمىسۇن، بېيجىڭ ھۆكۈمىتىنىڭ تەيۋەن بوغۇزىنىڭ ھەر ئىككى تەرىپىنىڭمۇ پەقەت بىرلا دۆلەتكە تەۋە ئىكەنلىكىنى بىلدۈرىدىغان «بىر خىتاي پىرىنسىپى» نى پۈتۈنلەي قوللايدىغانلىقىنى تىلغا ئالغان.
خەۋەرگە قارىغاندا، يەتتە يىلدىن كېيىن تۇنجى قېتىم شىمالىي كورېيەنى زىيارەت قىلغان شى جىنپىڭ بولسا كىم جۇڭئۇنغا، بۇ ساياھىتىنى ئۆزئارا مۇناسىۋەتلەردە ئىنتايىن مۇھىم ئىلگىرىلەشلەرنى تەمىنلەش ئۈچۈن بىر پۇرسەت سۈپىتىدە قوللىنىدىغانلىقىنى ئېيتقان.
خەۋەردە يەنە، ئىككى رەھبەرنىڭ يۇقىرى دەرىجىلىك مەسئۇللارنىڭ ئۆزئارا زىيارەتلىرى ئارقىلىق ئىككى دۆلەت ئوتتۇرىسىدىكى ئىستراتېگىيەلىك ئالاقىنى تېخىمۇ چوڭقۇرلاشتۇرۇش مەسىلىسىدىمۇ كېلىشكەنلىكلىرى ئەسكەرتىلگەن.
شىمالىي كورېيە تاراتقۇلىرى رەھبەرلەرنىڭ پيوڭياڭ ھۆكۈمىتىنىڭ يادرو قورال پىلانىنى مۇزاكىرە قىلغان-قىلمىغانلىقىغا ئائىت ھېچقانداق مەلۇمات بەرمىدى.
خىتاي دۆلەت خەۋەر ئاگېنتلىقى شىنخۇامۇ شى جىنپىڭنىڭ شىمالىي كورېيە زىيارىتىنى دۈشەنبە كۈنى جىددىي خەۋەر قىلغان ئىدى.
