ئامېرىكا پىرېزىدېنتى دونالد ترامپ ياۋروپا ئىتتىپاقى كومىتېتىنىڭ رەئىسى ئۇرسۇلا ۋون دېر لېيېن بىلەن ئۆتكۈزگەن تېلېفون سۆھبىتىدىن كېيىن، ياۋروپا ئىتتىپاقى ماللىرىدىن ئېلىنىدىغان %50 لىك تاموژنا بېجىنىڭ ئىجرا قىلىنىش ۋاقتىنى 9-ئىيۇلغىچە كېچىكتۈرۈشكە قوشۇلدى.
ترامپ يەكشەنبە كۈنى «Truth Social» سۇپىسىدا ئېلان قىلغان باياناتىدا، ۋون دېر لېيېننىڭ سۆھبەت جەريانىدا ياۋروپا ئىتتىپاقى ماللىرىدىن ئېلىنىدىغان تاموژنا بېجىنىڭ ئىجرا قىلىنىش ۋاقتىنى كېچىشتۈرۈشنى تەلەپ قىلغانلىقىنى ۋە «سۆھبەتنىڭ تېزلىك بىلەن باشلىنىدىغانلىقىنى» بىلدۈرگەنلىكىنى ئېيتتى.
ترامپ بۇ تەلەپنى قوبۇل قىلىش قارارىنى «ئالاھىدە قارار» دەپ ئاتىدى.
ۋون دېر لېيېنمۇ ترامپ بىلەن سۆھبەت ئۆتكۈزگەنلىكىنى دەلىللەپ، ياۋروپا ئىتتىپاقىنىڭ سۆھبەتنى «تېز ۋە قەتئىي ھالدا» ئىلگىرى سۈرۈشكە تەييار ئىكەنلىكىنى ئەسكەرتىپ مۇنداق دېدى:
«ياۋروپا ئىتتىپاقى بىلەن ئامېرىكا قوشما ئىشتاتلىرى دۇنيادىكى ئەڭ مۇھىم ۋە يېقىن سودا مۇناسىۋەتلىرى ئىگە.
كېلىشىم ھاسىل قىلىش ئۈچۈن تاموژنا بېجىنىڭ ئىجرا قىلىنىش ۋاقتىنى 9-ئىيۇلغىچە كېچىشتۈرۈشكە ئېھتىياجىمىز بار.»
ترامپ ئىلگىرى 1-ئىيۇندىن باشلاپ ياۋروپا ئىتتىپاقىدىن ئىمپورت قىلىنىدىغان ماللاردىن يۇقىرى نىسبەتتە تاموژنا بېجى ئېلىنىدىغانلىقى توغرىسىدا تەھدىت سالغان، بۇنىڭغا ياۋروپا ئىتتىپاقىنىڭ ئامېرىكا شىركەتلىرىگە زىيان سالغان ئادالەتسىز سودا پائالىيەتلىرى ۋە توسالغۇلىرىنىڭ سەۋەب بولغانلىقىنى ئىلگىرى سۈرگەنىدى.
ترامپنىڭ بۇ تەھدىتى دۇنيا پۇل - مۇئامىلە بازارلىرىنى تەۋرىتىۋەتكەنىدى.
بۇ ئەھۋال ۋاشىنگىتون بىلەن بىريۇسسېل ئوتتۇرىسىدىكى جىددىيچىلىكنىڭ ۋاقىتلىق پەسەيگەنلىكىدىن دېرەك بەرسىمۇ، ئەمما ئىككى تەرەپ ئوتتۇرىسىدىكى تاموژنا بېجى ۋە نازارەت قىلىپ باشقۇرۇش سىياسەتلىرىدە كۆرۈنەرلىك پەرق يەنىلا مەۋجۇت.
