دۈشەنبە كۈنى كېچىدە غەززەگە قاراپ يولغا چىققان «مادلىن» ناملىق ئاممىۋىي ياردەم پاراخوتىنىڭ ئۈستىدە بىر كۆزىتىش ئۇچقۇچىسىز ئايروپىلانى كۆرۈلدى. «ئەركىنلىك فىلوتى ئىتتىپاقى» نىڭ بىلدۈرۈشىچە، بۇ ۋەقە گىرېتسىيە دېڭىز تەۋەلىكىدىن 68 كىلومېتىر يىراقلىقتا يۈز بەرگەن.
ئىتتىپاق تەرىپىدىن ئېلان قىلىنغان باياناتتا، ھازىر گىرېتسىيە دېڭىز قىرغىقى مۇداپىئە قىسىملىرىنىڭ «ھېرون» تىپلىق ئۇچقۇچىسىز ئايروپىلانى دەپ ئاتالغان ھاۋا ئاپپاراتىنىڭ شۇ ۋاقىتتىن ئېتىبارەن يىراقلاشقانلىقى بىلدۈرۈلدى. «مادلىن» پاراخوتىدىكى 12 كىشىنىڭ ھەممىسى بىخەتەر.
گۇرۇپپا: «يېڭى ئۇچۇرلىرىمىزنى ھەمبەھىرلىگەن ۋە ‹مادلىن› دىكىلەرگە مەدەت بەرگەن ھەممەيلەنگە رەھمەت ئېيتىمىز. بۇ تىنچلىقپەرۋەر پۇقرالارنىڭ قارشىلىق ھەرىكىتىدۇر. ‹مادلىن› دىكى بارلىق پىدائىيلار ۋە پاراخوت خادىملىرى زوراۋانلىق قىلماسلىق توغرىسىدا تەربىيەلەنگەن» دېدى.
كېيىن يەنە بىر ئۇچقۇچىسىز ئايروپىلاننىڭ پاراخوت ئۈستىدە ئايلىنىپ يۈرگەنلىكى خەۋەر قىلىندى.
يەكشەنبە كۈنى سىتسىلىيەدىن يولغا چىققان بۇ پاراخوت بوۋاقلار سۈت پاراشوكى، بوۋاقلار
زاكىسى، ئۇن، گۈرۈچ، تازىلىق بۇيۇملىرى، سۇ سۈزگۈچ ۋە داۋالاش ئەسلىھەلىرىدىن تەركىب تاپقان ئىنسانپەرۋەرلىك ياردەم بۇيۇملىرىنى ئېلىپ ماڭماقتا.
«ئەركىنلىك فىلوتى ئىتتىپاقى» تەرىپىدىن ئىسرائىلىيەنىڭ غەززەگە يۈرگۈزۈۋاتقان دېڭىز قورشاۋىنى بۇزۇپ تاشلاش ئۈچۈن ئۇيۇشتۇرۇلغان خەلقئارالىق تىرىشچانلىق دائىرىسىدىكى بۇ فىلوت كىشىلىك ھوقۇق تەشكىلاتلىرى ۋە قانۇن مۇتەخەسسىسلىرى تەرىپىدىن كەڭ كۆلەمدە ئەيىبلەنمەكتە.
ئىسرائىلىيە غەززە ياردەم فىلوتىنى توسۇشقا «تەييار ئىكەنلىكىنى» ئېيتتى
شۇنىڭ بىلەن بىر ۋاقىتتا، ئىسرائىلىيە ئارمىيەسىمۇ غەززەگە قاراپ يولغا چىققان «مادلىن» نى توسۇشقا تەييار ئىكەنلىكىنى ئېلان قىلدى. بۇ بايانات، ئىسرائىلىيەنىڭ ۋەھشىيانە قىرغىنچىلىقى داۋاملىشىۋاتقان بىر پەيتتە، قورشاۋ ئاستىدىكى رايوندا يۈز بەرگەن ئىنسانىي پاجىئەگە قارىتا كۈچىيىۋاتقان خەلقئارالىق ئەندىشىنىڭ ئارقىسىدىن ئېلان قىلىندى.
ئىسرائىلىيە ئارمىيەسىنىڭ باياناتچىسى بىرىگادا گېنېرالى ئەففى دەفرىن سەيشەنبە كۈنى ئۆتكۈزگەن ئاخبارات ئېلان قىلىش يىغىنىدا، ئارمىيەنىڭ «دېڭىز ساھەسىنىمۇ ئۆز ئىچىگە ئالغان بارلىق سەپلەردە» ھەرىكەتكە ئۆتۈشكە تەييار ئىكەنلىكىنى ئېيتتى. پاراخوتنىڭ نامىنى بىۋاسىتە تىلغا ئالمىغان ۋە «بىز تەييارمىز... شۇنىڭغا ئاساسەن ھەرىكەت قىلىمىز» دېگەن دەفرىن، دېڭىز ئارمىيەسىنىڭ «يېقىنقى يىللاردا تەجرىبە توپلىغانلىقىنى» مۇ سۆزىگە ئىلاۋە قىلدى.
«ئەركىنلىك فىلوتى ئىتتىپاقى» ۋەزىپىنىڭ تىنچلىقپەرۋەر خاراكتېرىنى يەنە بىر قېتىم تەكىتلەپ جاۋاب قايتۇردى. ئىكس (X) ھېسابىدا ئېلان قىلىنغان باياناتتا: «بىز بىرلىكتە غەززەگە بىر خەلق دېڭىز كارىدورى ئاچالايمىز» دېيىلدى.
«ئەركىنلىك فىلوتى» نىڭ ھازىرقى سەپىرى، ئىنسانپەرۋەرلىك ياردەم تەشكىلاتلىرى ۋە بىرلەشكەن دۆلەتلەر تەشكىلاتىنىڭ ئىسرائىلىيەگە قارىتا ئاگاھلاندۇرۇشلىرى داۋاملىشىۋاتقان بىر مەزگىلدە ئېلىپ بېرىلماقتا. ماي ئېيىدا، ب د ت، ئىسرائىلىيەنىڭ ئايلاردىن بۇيان رايونغا يېمەكلىك ۋە ماددىي ئەشيا ئېقىمىنى توسۇپ كېلىۋاتقان قورشاۋى ئاستىدا، غەززە نوپۇسىنىڭ پۈتۈنلەي ئاچارچىلىققا دۇچ كېلىۋاتقانلىقى توغرىسىدا ئاگاھلاندۇرغان ئىدى.
ئىسرائىلىيەنىڭ قىرغىنچىلىقى
ئىسرائىلىيە 2023-يىلى ئۆكتەبىردىن بۇيان غەززەدە ئىرقىي قىرغىنچىلىق ئېلىپ بارماقتا. پەلەستىنلىكلەر، كۆپىنچىسى ئاياللار ۋە بالىلار بولۇپ، 54 مىڭ 470 دىن ئارتۇق پەلەستىنلىكنىڭ ئۆلتۈرۈلگەنلىكىنى قەيت قىلدى.
پەلەستىن رەسمىي ئاخبارات ئاگېنتلىقى ۋافا (WAFA) نىڭ خەۋىرىگە قارىغاندا، 11 مىڭ پەلەستىنلىكنىڭ ۋەيران بولغان ئۆيلەرنىڭ خارابىلىرى ئاستىدا ھازىرمۇ مەۋجۇت ئىكەنلىكىگە دائىر ئەندىشە ئۇقتۇرۇلدى.
ئەمما مۇتەخەسسىسلەر ھەقىقىي ئۆلگەنلەر سانىنىڭ غەززە دائىرىلىرى دوكلات قىلغاندىن كۆپ يۇقىرى ئىكەنلىكىنى ئىلگىرى سۈرمەكتە ۋە بۇ ساننىڭ 200 مىڭ ئەتراپىدا بولۇشى مۇمكىنلىكىنى مۆلچەرلىمەكتە.
ئىرقىي قىرغىنچىلىق جەريانىدا، ئىسرائىلىيە ئولتۇراق رايونلارنىڭ كۆپ قىسمىنى خارابىلىككە ئايلاندۇردى ۋە نوپۇسنىڭ ھەممىسىنى دېگۈدەك ئۆي-ماكانلىرىدىن ئايرىدى.
ياردەم تەشكىلاتلىرى ئىككى مىليوندىن ئارتۇق ئادەم ياشايدىغان قورشاۋ ئاستىدىكى بۇ رايوندا ئاچارچىلىق يۈز بېرىشى مۇمكىنلىكى توغرىسىدا ئاگاھلاندۇرۇشلىرىنى داۋاملاشتۇرماقتا.
نويابىر ئېيىدا خەلقئارا جىنايى ئىشلار سوتى ئىسرائىلىيە باش مىنىستىرى بېنيامىن نېتانياھۇ ۋە سابىق دۆلەت مۇداپىئە مىنىستىرى يوئاۋ گالانت ئۈستىدىن غەززەدە ئۇرۇش جىنايىتى ۋە ئىنسانىيەتكە قارشى جىنايەت ئۆتكۈزگەنلىكى سەۋەبىدىن قولغا ئېلىش بۇيرۇقى چىقاردى.
