يەمەندىكى خۇسىيلار، سەئۇدى ئەرەبىستانغا تەۋە بىر F-15 تىپلىق كۈرەشچى ئايروپىلاننى ئېتىپ چۈشۈرگەنلىكىنى دەۋا قىلدى.

خۇسىيلارنىڭ ھەربىي باياناتچىسى يەھيا سەرى، X  ئىجتىمائىي تاراتقۇ سۇپىسىدىن ئېلان قىلغان باياناتىدا، سەئۇدى ئەرەبىستانغا تەۋە بىر F-15 تىپلىق كۈرەشچى ئايروپىلاننىڭ مارىب ئۆلكىسى ئاسمىنىدا يەرلىك ئىشلەپچىقىرىلغان، قۇرۇقلۇقتىن ھاۋاغا ئېتىلىدىغان باشقۇرۇلىدىغان بومبا بىلەن ئېتىپ چۈشۈرۈلگەنلىكىنى ئىلگىرى سۈردى.

يەھيا سەرى چۈشۈپ كەتكەن ئايروپىلاننىڭ قالدۇقلىرىنى ئىزدەش ئۈچۈن رايونغا كەلگەن باشقا F-15 ۋە تايفۇن (Typhoon) تىپلىق كۈرەشچى ئايروپىلانلارنىڭمۇ يەرلىك ئىشلەپچىقىرىلغان باشقۇرۇلىدىغان بومبىلار بىلەن نىشانغا ئېلىنغانلىقىنى ۋە رايوندىن يىراقلىشىشقا مەجبۇرلانغانلىقىنى تەكىتلىدى.

يېقىنقى بىر ھەپتە ئىچىدە يەمەننىڭ تائىز، لاھىج، جەۋف، ھەججە، مارىب، سادا ۋە بەيدا ئۆلكىلىرىگە سەئۇدى ئەرەبىستانغا تەۋە «F-15» ۋە «Typhoon» تىپلىق ئايروپىلانلار بىلەن 450 قېتىمدىن ئارتۇق ھاۋا ھۇجۇمى قىلىنغانلىقىنى ئېيتقان يەھيا سەرى، يەمەن ئاسمىنىنىڭ ھەرخىل دەخلى-تەرۇز ۋە ھۇجۇملارغا قارشى تاقاقلىق بولىدىغانلىقىنى بىلدۈردى.

خۇسىيلاردىن مەككە باياناتى

سەرى يەنە بىر تەرەپتىن مەككەنى نىشان قىلغانلىقى توغرىسىدىكى دەۋالارنىڭ ئەمەلىيەتكە ئۇيغۇن ئەمەسلىكىنى ئىلگىرى سۈردى.

سەئۇدى ئەرەبىستانغا قارىتىلغان ھۇجۇملاردا پەقەت نېفىت ئەسلىھەلىرى ۋە ھەربىي بازىلارنىلا نىشان قىلغانلىقىنى بىلدۈرگەن سەرى، مۇقەددەس جايلاردىن پۈتۈنلەي يىراق تۇرىدىغان بىر ئىستراتېگىيەنى يولغا قويۇۋاتقانلىقىنى ئىپادىلىدى.