ئىران ئامېرىكا بىلەن ئىسرائىلىيەنىڭ بوشەھر يادرو ئېلېكتىر ئىستانسىسىغا ھۇجۇم قىلغانلىقىنى بىلدۈردى

ئىران يادرو ئېنېرگىيەسى ئورگىنى ئامېرىكا قوشما ئىشتاتلىرى بىلەن ئىسرائىلىيەنىڭ بوشەھر يادرو ئېلېكتىر ئىستانسىسىغا ھۇجۇم قىلغانلىقىنى،  ئىستانسا تەۋەلىكىگە چۈشكەن بىر دانە بومبىنىڭ ھېچقانداق زىيان كەلتۈرۈپ چىقارمىغانلىقىنى  ئۇقتۇردى.

ئىران دۆلەتلىك خەۋەر ئاگېنتلىقى (IRNA) نىڭ مەزكۇر ئورگاننى مەنبە كۆرسىتىپ بەرگەن خەۋىرىگە ئاساسلانغاندا، يەرلىك ۋاقىت سائەت 21:08 (GMT 17:38) ئەتراپىدا جەنۇبتىكى بوشەھر شەھىرىدىكى يادرو ئېلېكتىر ئىستانسىسىغا يېقىن بىر جاي ھۇجۇمغا ئۇچرىغان.

مەزكۇر ئورگان بايانات ئېلان قىلىپ، «ئامېرىكا-زىئونىست دۈشمەن كۈچلىرى بوشەھر يادرو ئېلېكتىر ئىستانسىسى رايونىغا قايتا ھۇجۇم قىلدى. بوشەھر ئىستانسىسىنىڭ ئىچىگە بىر بومبا چۈشتى» دېدى.

باياناتتا يەنە «دەسلەپكى مەلۇماتلار شۇنى كۆرسەتتىكى، بۇ ۋەقە ھېچقانداق ماددىي ياكى تېخنىكىلىق زىيان ۋەياكى تالاپەت كەلتۈرۈپ چىقارمىدى، ئىستانسىنىڭ تۈرلۈك بۆلەكلىرى زىيانغا ئۇچرىمىدى» دېگەنلەرنى قەيت قىلدى.

IRNA ھۇجۇمغا ئامېرىكا قوشما ئىشتاتلىرى ۋە ئىسرائىلىيەنىڭ داۋاملىشىۋاتقان «دۈشمەنلىك ھەرىكەتلىرى»نىڭ بىر قىسمى دەپ باھا بەردى.

بۇ يېقىنقى كۈنلەردىن بۇيان يادرو ئەسلىھەلىرى ئەتراپىدا يۈز بەرگەنلىكى مەلۇم قىلىنغان ئىككىنچى قېتىملىق ھۇجۇم بولۇپ قالدى.

شۇنىڭغا ئوخشاش بىر ھۇجۇم 17-مارتتىمۇ يۈز بەرگەن، ئەمما ھېچقانداق زىيان ياكى يارىلىنىش كۆرۈلمىگەنىدى.