ئامېرىكا جەنۇبىي قوماندانلىق ئىشتابى (SOUTHCOM) بايانات ئېلان قىلىپ، ئامېرىكا ئارمىيەسىنىڭ شەرقىي تىنچ ئوكياندا زەھەرلىك چېكىملىك ئەتكەسچىلىكىگە چېتىشلىقى بار دەپ قارالغان ئىككى كېمىگە ھۇجۇم قىلغانلىقىنى ئۇقتۇردى.
قوماندانلىق ئىشتابى مەزكۇر ھەرىكەتنىڭ پەيشەنبە كۈنى ئامېرىكا دۆلەت مۇداپىئە مىنىستىرى پىتېر ھېگسېتنىڭ (Pete Hegseth) بۇيرۇقى بىلەن ئېلىپ بېرىلغانلىقىنى ۋە «جەنۇبىي نەيزە» (Southern Spear) بىرلەشمە ۋەزىپە گۇرۇپپىسى تەرىپىدىن خەلقئارا دېڭىز تەۋەلىكىدە ئىجرا قىلىنغانلىقىنى بىلدۈردى.
ئامېرىكا جەنۇبىي قوماندانلىق ئىشتابى «X» (تىۋىتتېر) ئادرېسىدا ئېلان قىلغان ئۇچۇرىدا: «ئىستىخبارات خادىملىرى كېمىلەرنىڭ شەرقىي تىنچ ئوكياندىكى مەلۇم بولغان زەھەرلىك چېكىملىك ئەتكەسچىلىك لىنىيەلىرى بويلاپ ھەرىكەت قىلىۋاتقانلىقىنى ۋە ئەتكەسچىلىك پائالىيەتلىرى بىلەن شۇغۇللىنىۋاتقانلىقىنى دەلىللىدى» دېگەنلەرنى قەيت قىلدى.
باياناتتا يەنە: «بۇ ھەرىكەتلەر جەريانىدا بىرىنچى كېمىدە ئۈچ، ئىككىنچى كېمىدە ئىككى كىشى بولۇپ، جەمئىي بەش نەپەر زەھەرلىك چېكىملىك تېررورچىسى ئۆلتۈرۈلدى. ئامېرىكا ئەسكەرلىرىدىن ھېچكىم زىيان-زەخمەتكە ئۇچرىمىدى» دېگەن ئىبارىلەرگە ئورۇن بېرىلدى.
بۇ قېتىملىق ھۇجۇملار ئامېرىكا ئارمىيەسىنىڭ بىر كۈن بۇرۇن زەھەرلىك چېكىملىك توشۇغانلىقى ئىلگىرى سۈرۈلگەن يەنە بىر كېمىگە ھۇجۇم قىلىپ، تۆت كىشىنى ئۆلتۈرۈشىنىڭ ئارقىسىدىنلا يۈز بەردى.
يېڭى ھۇجۇملارنى قوشۇپ ھېسابلىغاندا، ئامېرىكىنىڭ كارىب دېڭىزى ۋە شەرقىي تىنچ ئوكياندىكى ھەربىي ھەرىكەتلىرىدە ئۆلگەنلەر سانى 104 كە ئۆرلىدى.
