كراسنودار رايونىنىڭ ۋالىيسى ۋېنىئامىن كوندىراتيېۋنىڭ چارشەنبە كۈنى بەرگەن باياناتىغا قارىغاندا، رۇسىيەنىڭ غەربىي ساھىلىدىكى نوۋوروسسىيسك شەھىرىدە ئۇكرائىنىڭ ئۇچقۇچىسىز ھاۋا ئاپپاراتى ھۇجۇمى نەتىجىسىدە بىر بالىنىمۇ ئۆز ئىچىگە ئالغان تۆت كىشى ھاياتىدىن ئايرىلغان، 29 كىشى يارىلانغان
نوۋوروسسىيسك شەھەر باشلىقى ئاندرېي كراۋچېنكو چارشەنبە كۈنى ئەتىگەن تەرەپلەردە ئېلان قىلغان باياناتىدا، ئۇچقۇچىسىز ھاۋا ئاپپاراتى پارچىلىرىنىڭ ھەرخىل ئورۇنلارنىڭ ساھەسىگە ۋە كىشىلەر ياشايدىغان بىر بىنانىڭ يېنىغا چۈشكەنلىكىنى ئېيتتى.
يەنە بىر تەرەپتىن، رۇسىيە دۆلەت مۇداپىئە مىنىستىرلىقى چارشەنبە كۈنى ئايرىم بىر بايانات ئېلان قىلىپ، ئۇرۇشنى ئاخىرلاشتۇرۇشقا ئائىت دىپلوماتىك تىرىشچانلىقلار داۋاملىشىۋاتقان بىر پەيتتە ھەم موسكۋا ھەم كىيېۋنىڭ ھۇجۇملارنى داۋاملاشتۇرۇۋاتقانلىقىنى، قىسىملىرىنىڭ كېچىچە 596 ئۇكرائىنا ئۇچقۇچىسىز ھاۋا ئاپپاراتىنى ئېتىپ چۈشۈرگەنلىكىنى بىلدۈردى.
رايون ۋالىيسىىنىڭ باياناتىغا قارىغاندا، كېچە سائەتلىرىدە ئۇكرائىنامۇ تالاپەتكە ئۇچرىغان؛ مولدوۋا چېگراسىدىكى سىتاروكوزاچى خەلقئارالىق چېگرا ئېغىزىغا بىر رۇسىيە ئۇچقۇچىسىز ھاۋا ئاپپاراتىنىڭ تېگىشى نەتىجىسىدە ئىككى كىشى ھاياتىدىن ئايرىلغان، ئۈچ كىشى يارىلانغان.
ئودېسسا رايونىنىڭ ۋالىيسى ئولېگ كىپېر ئاممىۋى ئورتاقلىشىش تور بېتىدە ئېلان قىلغان باياناتىدا: «بۇ كېچىدە دۈشمەن ئۇچقۇچىسىز ھاۋا ئاپپاراتلىرى مولدوۋا چېگراسىدىكى سىتاروكوزاچى خەلقئارالىق قۇرۇقلۇق چېگرا ئېغىزىغا ھۇجۇم قىلدى» دېدى ۋە دەسلەپكى ئېنىقلاشلارغا قارىغاندا چېگرا ئېغىزى يېنىدىكى پۇقرالاردىن ئىككى كىشىنىڭ ھاياتىدىن ئايرىلغانلىقىنى، ئۈچ كىشىنىڭ يارىلانغانلىقىنى بىلدۈردى.
ھۇجۇملار رۇسىيە پىرېزىدېنتى ۋلادىمىر پۇتىن بىلەن ئامېرىكا پىرېزىدېنتى دونالد ترامپنىڭ توقۇنۇشنى ھەل قىلىش تىرىشچانلىقلىرىنى سۆزلىشىش ئۈچۈن ئۆتكۈزگەن تېلېفون سۆھبىتىدىن بىرنەچچە سائەت كېيىنلا يۈز بەردى.
كېرېمىل سارىيى مەسلىھەتچىسى يۇرىي ئۇشاكوۋ، پۇتىننىڭ ترامپقا رۇسىيەنىڭ «ياۋروپاغا ھېچقانداق شەكىلدە تاجاۋۇزچىلىق پىلانى يوق» دەپ كاپالەت بەرگەنلىكىنى ۋە ئىككى رەھبەرنىڭ يەنە مەيداندىكى ئەھۋالنى، ئەسىرلەرنى ئالماشتۇرۇشنى ۋە رۇسىيە بىلەن ئۇكرائىنا ئوتتۇرىسىدىكى باشقا ئىنسانىي مەسىلىلەرنى سۆزلەشكەنلىكىنى بىلدۈردى.
تاشقى ئىشلار مىنىستىرى سەرگېي لاۋروۋ Channel One' تېلېۋىزىيە قانىلىغا بەرگەن باياناتىدا، ترامپنىڭ «ھەممىدىن ئاۋۋال ئۇكرائىنانى شىمالىي ئاتلانتىك ئوكيان ئەھدىنامىسى تەشكىلاتىغا كىرگۈزۈش ئۇرۇنۇشلىرىنى كاللىسىدىن چىقىرىۋېتىشى كېرەكلىكىنى» ئېيتقانلىقىنى ۋە مەسىلىنى «ھەل قىلىنغان» دەپ سۈپەتلىگەنلىكىنى ئىپادىلىدى.
