ئىسرائىلىيە ئارمىيەسى ئىشغال ئاستىدىكى غەربىي قىرغاقتىكى ئەل خەلىل شەھىرىدە قورشاۋىنى 5-كۈنىدىمۇ داۋاملاشتۇرۇش بىلەن بىرگە، 4 مىڭ 969 پەلەستىنلىكنى مەجبۇرىي ئۆي ماكانىدىن ئايرىدى.
ئەل خەلىل شەھەرلىك ھۆكۈمەت، شەھەردىكى ئەين دەير باھا ۋە جەلدە رايونلىرىدىكى قورشاۋ سەۋەبىدىن ئۆيلىرىدىن ھەيدەپ چىقىرىلغان ۋە سانى كۈندىن-كۈنگە كۆپىيىۋاتقان پەلەستىنلىكلەرنىڭ ئەھۋالىغا ئالاقىدار ئۇچۇر بەردى.
باياناتقا ئاساسلانغاندا، ئىسرائىلىيە ئارمىيەسىنىڭ 5-كۈنىدىمۇ داۋاملاشتۇرۇۋاتقان قورشاۋى دائىرىسىدە، شەھەردە ئۆيلىرىدىن مەجبۇرىي چىقىرىۋېتىلگەن ئائىلە سانى 780 گە، ئۆي ماكانىدىن يۆتكەلگەن پەلەستىنلىكلەرنىڭ سانى 4 مىڭ 969 غا يەتكەن. مەجبۇرىي ئۆي ماكانىدىن يۆتكەلگەنلەر ئارىسىدا 336 بوۋاق، 441 ياشانغان، 216 ھامىلىدار ياكى بالا ئېمىتىۋاتقان ئانا، 44 مېيىپ ۋە 312 ئاستا خاراكتېرلىك كېسەل بار ئىكەن.
بېسىپ كىرىش ۋە ئاختۇرۇشلار داۋاملاشماقتا
يەرلىك مەنبەلەر ۋە نەق مەيداندىكى گۇۋاھچىلارنىڭ يەتكۈزۈشىچە، ئىسرائىلىيە ئارمىيەسىگە قوشۇمچە قىلىنغان قىسىملار، ھەربىي ئاپتوموبىللارنىڭ ھەمراھلىقىدا كېچىدە ئەل خەلىل شەھىرىدىكى بەزى مەھەللىلەرگە بېسىپ كىرىپ، پەلەستىنلىكلەرنىڭ ئۆيلىرىنى ئاختۇرغان.
بۇنىڭدىن سىرت شەھەرنىڭ كىرىش ئېغىزلىرى شۇنداقلا يېزا ۋە مۇساپىرلار لاگېرلىرىنىڭ كىرىش ئېغىزلىرىمۇ ئىسرائىلىيە ئەسكەرلىرى تەرىپىدىن تاقالغان بولۇپ، پەلەستىنلىكلەرنىڭ ئۆتۈشىگە رۇخسەت قىلىنمىغان. جەلدە دوقمۇشىغا يېقىن جايدا قۇرۇلغان ھەربىي تەكشۈرۈش پونكىتلىرىدا پەلەستىنلىكلەر توسۇپ قېلىنىپ، ئۈستى ئاختۇرۇلغان ۋە ئاختۇرۇش جەريانىدا ناچار مۇئامىلىگە ئۇچرىغان.
شۇنىڭ بىلەن بىرگە، قورشاۋ ئاستىدىكى ئەين دەير باھا رايونى ئىسرائىلىيە ئارمىيەسىنىڭ قوشۇمچە كۈچلىرى بىلەن تولۇقلانغان. ئىسرائىلىيە ئەسكەرلىرى پەلەستىنلىكلەرگە تەۋە بەزى بىنالارغا ئورۇنلىشىپ، بۇ قۇرۇلۇشلارنى ھەربىي ئىشتابقا ئايلاندۇرۇۋالغان.
پەلەستىن ئەسىرلەر جەمئىيىتى، تۈنۈگۈنكى باياناتىدا، قورشاۋ دائىرىسىدە ئېلىپ بېرىلغان بېسىپ كىرىشلەردە 85 پەلەستىنلىكنىڭ تۇتقۇن قىلىنغانلىقىنى بىلدۈرگەن ئىدى.
ئەل خەلىلدىكى ھۇجۇم ۋە قورشاۋغا سەۋەب بولغان ۋەقەلەر
ئەل خەلىلدىكى ھەربىي ھۇجۇم ۋە قورشاۋ، شەھەرنىڭ غەربىي شىمال كىرىش ئېغىزىدىكى فەرش ئەل-ھېۋا رايونىدا 23-ئۆكتەبىردە بىر ئىسرائىلىيە تەكشۈرۈش پونكىتىدا يۈز بەرگەن قوراللىق ھۇجۇمدىن كېيىن باشلانغان ئىدى. بۇ ھۇجۇمدا ئىككى ئىسرائىلىيە ئەسكىرى ئۆلگەن، ئۈچ ئەسكەر يارىلانغان بولۇپ، ھۇجۇم قىلغان ئىككى پەلەستىنلىكمۇ ئىسرائىلىيە ئارمىيەسى تەرىپىدىن ئۆلتۈرۈلگەن ئىدى.
ئىسرائىلىيە ئارمىيەسى ئەل خەلىلگە قارىتىلغان ھۇجۇم ۋە قورشاۋنىڭ بىر قانچە كۈن داۋاملىشىشى مۇمكىنلىكىنى ئۇقتۇردى.
ئىسرائىلىيە دۆلەت مۇداپىئە مىنىستىرى ئىسرائېل كاتس قورشاۋ باشلىنىپ ئىككى كۈندىن كېيىن بەرگەن باياناتىدا، ئەل خەلىلدە ئۆيلىرىدىن چىقىرىۋېتىلگەن تەخمىنەن ئىككى مىڭ پەلەستىنلىكنىڭ، شەھەردىكى ھاماسنىڭ «ئۇل ئەسلىھەسى» دەپ قارىغان قۇرۇلۇشلار ئىسرائىلىيە قىسىملىرى تەرىپىدىن ۋەيران قىلىنىپ بولغۇچە ئۆيلىرىگە قايتالمايدىغانلىقىنى ئىلگىرى سۈردى. باش مىنىستىر بېنيامىن نېتانياھۇمۇ ھۇجۇمدىن كېيىن ئىشغال ئاستىدىكى غەربىي قىرغاقتا 1967-يىلىدىكى ئۇرۇشتىن بۇيان كۆرۈلۈپ باقمىغان دەرىجىدە چوڭ كۆلەملىك بىر ھەربىي ھۇجۇم قوزغاش بىلەن تەھدىت سالدى.
ئەل خەلىلدىكى بۇ ئۆزگىرىشلەر، 2023-يىلى ئۆكتەبىردە غەززە رايونىغا قارىتىلغان ھۇجۇملار باشلانغاندىن بۇيان ئىشغال ئاستىدىكى غەربىي قىرغاقتا كۈچىيىۋاتقان ھەربىي بېسىپ كىرىش، پەلەستىنلىكلەرنى ئۆلتۈرۈش ۋە تۇتقۇن قىلىش، ئۆي ۋە خىزمەت ئورۇنلىرىنى ۋەيران قىلىش، دېھقانچىلىق يەرلىرىنى ۋەيران قىلىش ۋە مەجبۇرىي ئۆي ماكانىدىن يۆتكەش قىلمىشلىرى بىلەن تەڭ يۈز بەرمەكتە.
