سۈرىيە لازقىيەدە دائېشنىڭ ئۇۋىسىنى يەر بىلەن يەكسان قىلىۋەتتى

سۈرىيەلىك بىر ئەمەلدار، تېررورىزمغا قارشى كۈرەش ھەرىكىتىدە ئىككى دائېش تېررورچىسىنىڭ ئۆلگەنلىكىنى، باشقىلىرىنىڭ تۇتۇلغانلىقىنى، توقۇنۇشتا بىر سۈرىيە ئىستىخبارات خادىمىنىڭ ئېغىر يارىلانغانلىقىنى بىلدۈردى.

سۈرىيە ئىچكى ئىشلار مىنىستىرلىقى دائېشقا چېتىشلىق بىر تېررورلۇق تەشكىلاتى ئەزالىرىنىڭ دۆلەتنىڭ دېڭىز قىرغىقى رايونىدا ھۇجۇم پىلانلىرى تۈزۈۋاتقان پەيتتە ئۇۋىسىدا قولغا چۈشۈرۈلۈپ، بىر تەرەپ قىلىنغانلىقىنى بىلدۈردى.

دۆلەتكە قاراشلىق سۈرىيە ئەرەب خەۋەر ئاگېنتلىقى (SANA) نىڭ خەۋەر قىلىشىچە، لازقىيەنىڭ ئىچكى بىخەتەرلىكىگە مەسئۇل بىرىگادا كوماندىرى ئابدۇلئەزىز ھىلال ئەلئەھمەد دۈشەنبە كۈنى كەچتە، مەزكۇر ئۇۋىنىڭ لازقىيە يېزىلىرىنىڭ شىمالىدىكى بەدرۇسىيە رايونىدا «سەزگۈر بىر بىخەتەرلىك ھەرىكىتى» ئارقىلىق نىشانغا ئېلىنغانلىقىنى، مەزكۇر تېررورلۇق ئۇۋىسىنىڭ سۈرىيەنىڭ دېڭىز قىرغىقى رايونىدا تېررورلۇق ھۇجۇملىرىنى پىلانلاۋاتقانلىقىنى ئېيتتى.

دۆلەت بىخەتەرلىك كۈچلىرى بىلەن دائېش ئەزالىرى ئوتتۇرىسىدا يۈز بەرگەن توقۇنۇشلاردا مەزكۇر ئۇۋىنىڭ ئىككى ئەزاسىنىڭ ئۆلگەنلىكىنى، قالغانلىرىنىڭ تۇتۇلغانلىقىنى ئېيتقان ئەھمەد، تۇتۇلغانلارنىڭ سانى ھەققىدە مەلۇمات بەرمىدى، بىر ئىستىخبارات خادىمىنىڭ بولسا توقۇنۇشلاردا ئېغىر يارىلانغانلىقىنى قەيت قىلدى.

 ھەربىي ھەرىكەت جەريانىدا تۈرلۈك قورال - ياراغ ۋە ئوق – دورىلار قولغا چۈشۈرۈلدى.

 بەششار ئەسەدنىڭ 2024 – يىلىنىڭ ئاخىرلىرى ئاغدۇرۇلۇشىدىن كېيىن، سۈرىيەنىڭ يېڭى ھاكىمىيىتى بىخەتەرلىكنى قايتىدىن ئورنىتىش، ئىسلاھاتلارنى ئىلگىرى سۈرۈش، ئىجتىمائىي ماسلىشىشنى كۈچەيتىش ھەمدە رايونلۇق ۋە يەر شارى خاراكتېرلىك ئاكتىيورلار بىلەن ھەمكارلىقنى ئاشۇرۇشقا مەركەزلەشتى.

تەخمىنەن 25 يىلدىن بۇيان ھاكىمىيەتنىڭ رەھبىرى بولغان بەششار ئەسەد ئۆتكەن يىلى دېكابىردا رۇسىيەگە قاچتى. بۇ ئەھۋال 1963 – يىلىدىن بۇيان ھاكىمىيەت بېشىدىكى بەئىس پارتىيەسى ھاكىمىيىتىنىڭ ئاغدۇرۇلۇشىغا سەۋەب بولدى.

بۇ دۆلەتتە يانۋار ئېيىدا پىرېزىدېنت ئەھمەد شارا رەھبەرلىكىدە يېڭى بىر ئۆتكۈنچى ھاكىمىيەت قۇرۇلدى.