ئامېرىكانىڭ تاموژنا بېجى مەسىلىسىدە سودا جىددىيچىلىكىنى باش كەچۈرۈۋاتقان ھىندىستان بىلەن تۈزگەن بۇ مۇداپىئە كېلىشىمى بۇ تۈردىكى تۇنجى سودا بولۇپ، ئىككى دۆلەت ھەربىي ھەمكارلىقىنى يەنىمۇ كۈچەيتىشى كۈتۈلمەكتە.
ئامېرىكا دۆلەت مۇداپىئە بىخەتەرلىك ھەمكارلىق ئىدارىسى (DSCA) چارشەنبە كۈنى بايانات ئېلان قىلىپ، ئامېرىكا تاشقى ئىشلار مىنىستىرلىقىنىڭ ھىندىستانغا 93 مىليون دوللارلىق تانكىغا قارشى «جاۋېلىن» باشقۇرۇلىدىغان بومبا سىستېمىسى ۋە «ئېكسكالىبۇر» زەمبىرەك ئوق-دورىلىرىنى سېتىشنى تەستىقلىغانلىقىنى بىلدۈردى.
بۇ ھىندىستاننىڭ ئامېرىكانىڭ چەت ئەللەرگە ھەربىي ئۈسكۈنە سېتىش پىروگراممىسى دائىرىسىدە ئېلىپ بارغان تۇنجى سېتىۋېلىشى بولۇپ ھېسابلىنىدۇ. ئىككى دۆلەت مۇناسىۋىتى ئۆتكەن يىلى ئاۋغۇستتا، ئامېرىكا پىرېزىدېنتى دونالد ترامپنىڭ يېڭى دېھلىنىڭ رۇسىيەدىن نېفىت سېتىۋېلىشىغا قارشى تەدبىر سۈپىتىدە، ھىندىستان مەھسۇلاتلىرىغا قويۇلغان تاموژنا بېجىنى %50 كە ئۆستۈرۈشى بىلەن ناچارلاشقان ئىدى.
بۇ يېڭى كېلىشىم، ھىندىستاننىڭ يەرلىك مەھسۇلاتى بولغان «تېجاس» ئۇرۇش ئايروپىلانلىرى ئۈچۈن «گېنېرال ئېلېكترىك» شىركىتى ئىشلەپچىقارغان ماتورلارنى مۇشۇ ئايدا قايتا زاكاز قىلىشىدىن كېيىنلا ئىمزالاندى.
دۆلەت مۇداپىئە بىخەتەرلىك ھەمكارلىق ئىدارىسى باياناتىدا مۇنداق دېدى: «بۇ سودا ئامېرىكانىڭ تاشقى سىياسىتى ۋە دۆلەت بىخەتەرلىك نىشانلىرى ئۈچۈن پايدىلىق ھەمدە ئامېرىكا-ھىندىستان ئىستراتېگىيەلىك مۇناسىۋىتىنى كۈچەيتىدۇ. شۇنداقلا ھىندى-تېنچ ئوكيان ۋە جەنۇبىي ئاسىيا رايونلىرىدا سىياسىي مۇقىملىق، تىنچلىق ۋە ئىقتىسادىي تەرەققىياتنىڭ مۇھىم كۈچى بولۇپ كېلىۋاتقان ھىندىستاندەك مۇھىم بىر مۇداپىئە ھەمراھىمىزنىڭ بىخەتەرلىكىنى ئاشۇرۇشقا ياردەم بېرىدۇ».
ئىدارىنىڭ بىلدۈرۈشىچە، ھىندىستان ھۆكۈمىتى كەم دېگەندە 216 دانە «ئېكسكالىبۇر» تاكتىكىلىق ئوق-دورا ۋە 100 يۈرۈش «جاۋېلىن» سىستېمىسى سېتىۋېلىشنى تەلەپ قىلغان. ھىندىستان ھازىر «ئېكسكالىبۇر» ئوق-دورىلىرىنى M-777 تىپلىق گاۋبىتسادا ئىشلىتىۋاتىدۇ.
بۇ سودىدىكى ئاساسلىق ھۆددىگەرلەرنىڭ «ئېكسكالىبۇر» ئوق-دورىلىرى ئۈچۈن «RTX» شىركىتى، «جاۋېلىن» سىستېمىسى ئۈچۈن بولسا، «RTX» بىلەن «لوكهىد مارتىن» شىركىتىنىڭ بىرلەشمە كارخانىسى بولىدىغانلىقى قەيت قىلىندى.
