ئىستانبۇل بوغۇزىدا ئۆتكۈزۈلگەن مۇسابىقىدە، سېلىم قاقىشنىڭ يېتەكچىلىكىدىكى «Zacapa» ناملىق كېمە «زەپەر لوڭقىسى» غا ئېرىشتى.
جۇمھۇر رەئىسلىك مەھكىمىسىنىڭ ھىمايىسىدە، مەدەنىيەت ۋە ساياھەت مىنىستىرلىقى ھەمدە ياشلار ۋە تەنتەربىيە مىنىستىرلىقىنىڭ قوللىشى، ئىستانبۇل ۋالىي مەھكىمىسى ۋە تۈركىيە ساياھەتنى تەرەققىي قىلدۇرۇش ئىدارىسىنىڭ ھەمكارلىقىدا، ئىستانبۇل ئوچۇق دېڭىز يەلكەنلىك كېمە مۇسابىقە كۇلۇبى تەرىپىدىن ئۇيۇشتۇرۇلغان 7-نۆۋەتلىك جۇمھۇر رەئىسلىك مەھكىمىسى خەلقئارا يەلكەنلىك كېمە مۇسابىقىسىنىڭ ئۈچىنچى باسقۇچى بولغان «زەپەر لوڭقىسى» تاماملىنىپ، غەلىبە قىلغۇچىلار بېكىتىلدى. مۇسابىقىگە 58 كوماندا ۋە 600 دىن ئارتۇق تەنھەرىكەتچى قاتناشتى.
30-ئاۋغۇست زەپەر بايرىمىغا ئاتالغان بۇ ئالاھىدە مۇسابىقە چىراغان سارىيى ئالدىدىن باشلىنىپ، ئارناۋۇتكۆيدە ئاخىرلاشتى. تەنھەرىكەتچىلەر ئىستانبۇل بوغۇزىنىڭ قاتتىق شامىلىغا قارشى ئىستراتېگىيە ۋە تېخنىكىلىرىنى جارى قىلدۇرۇپ پۈتۈن كۈچى بىلەن رىقابەتلەشتى.
مۇسابىقىدە سېلىم قاقىشنىڭ يېتەكچىلىكىدىكى «Zacapa» كوماندىسى بىرىنچى بولدى؛ ئوغۇز ئاياننىڭ يېتەكچىلىكىدىكى «Angel's Of CMC Holding» كوماندىسى ئىككىنچى، لەۋەنت پەينىرجىنىڭ يېتەكچىلىكىدىكى «Enka» كوماندىسى ئۈچىنچى بولۇپ مۇسابىقىنى تاماملىدى.
ئىستانبۇل ئوچۇق دېڭىز يەلكەنلىك كېمە مۇسابىقە كۇلۇبىنىڭ رەئىسى ئەكرەم يەملىھائوغلۇ، زەپەر بايرىمى كۈنى شۇنداق چوڭ بىر پائالىيەتنى ئۇيۇشتۇرغانلىقىدىن پەخىرلىنىدىغانلىقىنى بىلدۈرۈپ مۇنداق دېدى: «600 دىن ئارتۇق تەنھەرىكەتچىمىزنىڭ تۈركىيە بايرىقى بىلەن زىننەتلەنگەن يەلكەنلىك كېمىلىرى بىلەن كۆرسەتكەن تىرىشچانلىقى، شانلىق تارىخىمىز ۋە غەلىبىمىزگە لايىق بىر كۆرۈنۈش ئېلىپ كەلدى. بىز پەقەت بىر تەنھەرىكەت مۇسابىقىسىلا ئۆتكۈزمىدۇق، بەلكى ئۆتمۈشىمىزگە بولغان مىننەتدارلىقىمىزنى ئىپادىلىدۇق. بۇ چوڭ پائالىيەتكە تۆھپە قوشقان بارلىق ئورگانلارغا ۋە بىز بىلەن بىرگە بولغان ئىستانبۇل خەلقىگە رەھمەت ئېيتىمەن.»
