جۇمھۇر رەئىس ئەردوغان ئىككى دۆلەت ئوتتۇرىسىدا سودا، ئېنېرگىيە ۋە بىخەتەرلىك ساھەلىرى قاتارلىق نۇرغۇن مەسىلىلەردە ھەمكارلىقنى تەرەققىي قىلدۇرۇشقا ئەھمىيەت بېرىدىغانلىقىنى ئىپادىلىدى.

تۈركىيە جۇمھۇرىيىتى جۇمھۇر رەئىسى رەجەپ تاييىپ ئەردوغان، ئەرەب بىرلەشمە خەلىپىلىكى ئەمىرى شەيخ مۇھەممەد بىن زايد ئەل ناھيان بىلەن تېلېفوندا كۆرۈشتى.

جۇمھۇر رەئىسلىك مەھكىمىسى ئۇچۇر-ئالاقە ئىدارىسىنىڭ ئىجتىمائىي تاراتقۇ ھېسابىدىن ئېلان قىلىنغان باياناتقا ئاساسلانغاندا، سۆھبەتتە تۈركىيە بىلەن ئەرەب بىرلەشمە خەلىپىلىكىنىڭ ئىككى تەرەپلىك مۇناسىۋەتلىرى، رايونلۇق ۋە يەر شارى خاراكتېرلىك مەسىلىلەر مۇزاكىرە قىلىنغان.

ئەردوغان ئىران بىلەن ئامېرىكا ئوتتۇرىسىدىكى توقۇنۇش مۇساپىسىدە رايوندا كۆرۈلۈۋاتقان قىيىنچىلىقلارنىڭ كىشىنى ئەپسۇسلاندۇرىدىغانلىقىنى، ئەرەب بىرلەشمە خەلىپىلىكىنىڭ ئىگىلىك ھوقۇقى ۋە بىخەتەرلىكىنى تولۇق قوللاشنى داۋاملاشتۇرىدىغانلىقىنى بىلدۈرۈپ، يۈز بەرگەن زىيانلار سەۋەبىدىن ھال سورىدى.

جۇمھۇر رەئىس ئەردوغان تۈركىيەنىڭ مۇناسىۋەتلىك دۆلەتلەر بىلەن ئالاقە قىلىپ، ئامېرىكا بىلەن ئىران ئوتتۇرىسىدا دىپلوماتىك ھەل قىلىش چارىسىنى بەرپا قىلىش ئۈچۈن تىرىشچانلىق كۆرسىتىۋاتقانلىقىنى، رايوننىڭ بىخەتەرلىك ئېھتىياجىنى قاندۇرۇش ئۈچۈن تېخىمۇ كۆپ دىئالوگ ۋە ھەمكارلىقنىڭ زۆرۈرلىكىنى بايان قىلدى.