مىسىر تاشقى ئىشلار مىنىستىرى بەدر ئابدۇلئاتى نېتانياھۇنىڭ ئۇرۇش توختىتىشنى بىكار قىلىپ، غەززەدىكى ئۇرۇشنى قايتا باشلاش ئېھتىماللىقىغا دائىر ئەندىشىلەر كۈچىيىۋاتقان بىر پەيتتە بايانات ئېلان قىلىپ، ب د ت نى غەززە تىنچلىق ساقلاش قىسمى تەسىس قىلىشقا ھوقۇق بېرىشكە چاقىردى.
مىسىر بىرلەشكەن دۆلەتلەر تەشكىلاتى خەۋپسىزلىك كېڭىشىنى (ب د ت خ ك) غەززەدە خەلقئارالىق تىنچلىق ساقلاش ئالاھىدە قىسمى تەسىس قىلىشقا ھوقۇق بېرىش ئۈچۈن جىددىي ھەرىكەتكە ئۆتۈشكە چاقىرىپ، بۇ مەسىلىدە ھەر قانداق بىر كېچىكىشنىڭ ئامېرىكانىڭ قوللىشىدىكى نازۇك تىنچلىق يول خەرىتىسىنى خەۋپ ئاستىدا قالدۇرىدىغانلىقى توغرىسىدا ئاگاھلاندۇردى.
مىسىر تاشقى ئىشلار مىنىستىرى بەدر ئابدۇلاتى دۈشەنبە كۈنى ئەرەب بىرلەشمە خەلىپىلىكىنىڭ «The National» گېزىتىگە قىلغان سۆزىدە، قاھىرەنىڭ ئۇرۇش ۋەيرانچىلىقىغا ئۇچرىغان بۇ رايوندا ياردەم خىزمەتلىرىنى ماسلاشتۇرۇش ۋە قايتا قۇرۇش مۇساپىسىنى نازارەت قىلىش ئۈچۈن خەلقئارالىق مۇقىملىقنى ساقلاش قىسمى ھەمدە «تىنچلىق كومىتېتى» قۇرۇشنى قوللايدىغانلىقىنى بىلدۈردى.
مەزكۇر پىلان ئامېرىكا پىرېزىدېنتى دونالد ترامپ ئوتتۇرىغا قويغان تەشەببۇسنىڭ بىر قىسمى بولۇپ، 10-ئۆكتەبىردىكى ئۇرۇش توختىتىشتىن كېيىنكى باسقۇچلۇق مۇساپىنى ئۆز ئىچىگە ئالىدۇ. بۇ مۇساپە پەلەستىن ئىسلامىي قارشىلىق كۆرسىتىش ھەرىكىتى —ھاماسنى قورالسىزلاندۇرۇش ۋە رايونغا كۆپ دۆلەت قىسىملىرىدىن تەشكىل تاپقان ئەسكەرلەرنى ئورۇنلاشتۇرۇشنى ئۆز ئىچىگە ئالىدۇ.
ئابدۇلئاتى غەززەنىڭ پەلەستىن ھاكىمىيىتىنىڭ باشقۇرۇشىدا قېلىشى كېرەكلىكىنى تەكىتلەش بىلەن بىر ۋاقىتتا، ب د ت قارارىنىڭ بۇ ئىشنى «قانۇنىي ئاساس» تەمىنلەش ۋە تىنچلىق ساقلاش قىسمىنىڭ ۋەزىپە دائىرىسىنى ئايدىڭلاشتۇرۇشتا ھالقىلىق رول ئوينايدىغانلىقىنى ئىپادىلىدى.
«بۇ يەردىكى ۋەزىپە تىنچلىقنى مەجبۇرىي تاڭماسلىق، بەلكى تىنچلىقنى قوغداش بولۇشى كېرەك» دېگەن مىنىستىرلىق مىنىستىر، ئەزالىرى ئىچىدە ئەنگلىيەنىڭ سابىق باش ۋەزىرى تونىي بلايېرنىڭمۇ بولۇشى مۆلچەرلىنىۋاتقان خەلقئارالىق مۇقىملىقنى ساقلاش قىسمى ۋە «تىنچلىق كومىتېتى»نىڭ ساقچى ئىشلىرى، ئىدارە-باشقۇرۇش ۋە خەلقئارالىق ياردەملەرنى يەتكۈزۈشكە ياردەمدە بولىدىغانلىقىنى سۆزلىرىگە ئىلاۋە قىلدى.
ئامېرىكا رايوندا يۈز بېرىش ئېھتىمالى بولغان مۇقىمسىزلىقتىن ئەنسىرىمەكتە. ئامېرىكا مۇئاۋىن پىرېزىدېنتى ج.د.ۋېنسنىڭ ئىسرائىلىيەگە قىلغان يېقىنقى زىيارىتى، نېتانياھۇنىڭ ئۇرۇش توختىتىشنى ئاخىرلاشتۇرۇپ، ئۇرۇشنى قايتا باشلىشى مۇمكىنلىكىگە دائىر ئەندىشىلەر كۈچىيىۋاتقان بىر پەيتتە ئىشقا ئاشۇرۇلدى.
