بىرلەشكەن دۆلەتلەر تەشكىلاتى ئىرقىي ئايرىمچىلىقنى تۈگىتىش كومىتېتى جۈمە كۈنى ئېلان قىلغان باياناتىدا، ئۆلۈم خاراكتېرلىك ھۇجۇملارنى ئېلىپ بېرىش بىلەن ئەيىبلەنگەن پەلەستىنلىكلەرگە ئۆلۈم جازاسى بېرىشكە رۇخسەت قىلىدىغان ئىسرائىلىيەنىڭ يېڭى قانۇنىنىڭ پەلەستىنلىكلەرگە قارشى ئىرقىي ئايرىمچىلىقنى كۈچەيتىدىغانلىقىنى بىلدۈردى.
كومىتېت بۇ قانۇننىڭ ئىنسان ھوقۇقىنىڭ ئېغىر دەرىجىدە دەپسەندە قىلىنىشىدىن دېرەك بېرىدىغانلىقىنى ئەسكەرتتى.
مارت ئېيىدا ئىسرائىلىيە پارلامېنتى تەرىپىدىن قوبۇل قىلىنغان يېڭى قانۇنغا ئاساسلانغاندا، ئىشغال ئاستىدىكى غەربىي قىرغاقتا ھەربىي سوت مەھكىمىلىرى تەرىپىدىن «تېررورلۇق» دائىرىسىدە دەپ قارالغان ھۇجۇملارنى ئېلىپ بېرىش بىلەن ئەيىبلەنگەن پەلەستىنلىكلەرگە ئۆلۈم جازاسى بېرىلىدىكەن.
كومىتېتنىڭ بىلدۈرۈشىچە، بۇ قانۇن ئىسرائىلىيە 1962-يىلىدىن بۇيان ئەمەلىيەتتە يۈرگۈزۈپ كېلىۋاتقان ئۆلۈم جازاسىنى كېچىكتۈرۈش تۈزۈمىنى ئەمەلدىن قالدۇرۇپ، ئىنسان ھوقۇقىغا ئېغىر زەربە بەرگەن. مەزكۇر كومىتېت يەنە، بۇ قانۇننىڭ «ئەمەلىيەتتە پەقەت پەلەستىنلىكلەرگىلا تەتبىقلىنىدىغانلىقىنى» بىلدۈردى. شۇنداقلا، ئىسرائىلىيەدىن پەلەستىنلىكلەرگە قاراتقان بارلىق ئىرقىي ئايرىمچىلىق سىياسەتلىرىنى توختىتىشنى تەلەپ قىلدى.
