ھىندونېزىيە پىرېزىدېنتى پرابوۋو سۇبىيانتو ب د ت ئومۇمىي كېڭىشىگە، ئىنسانپەرۋەرلىك كىرىزىسى چوڭقۇرلىشىۋاتقان ۋە ئىرقىي قىرغىنچىلىق داۋاملىشىۋاتقان بىر پەيتتە، دۆلىتىنىڭ غەززەگە تىنچلىق ساقلاش قوشۇنى ئەۋەتىشكە تەييار ئىكەنلىكىنى بىلدۈردى. ئۇ: «غەززەدە داۋاملىشىۋاتقان چىدىغۇسىز پاجىئەنى ياد ئەتكەندە، ئىچىمىز قان يىغلايدۇ» دېدى.
ئۇ يەنە مۇنداق دېدى: «كۆپىنچىسى ئاياللار ۋە بالىلاردىن تەشكىل تاپقان مىڭلىغان بىگۇناھ ئىنسان قەتلى قىلىندى؛ قەھەتچىلىك ۋە ۋەيرانچىلىق يۈز بەردى. كۆز ئالدىمىزدا بىر ئىنسانىي ئاپەت يۈز بېرىۋاتىدۇ. بىگۇناھ پۇقرالارغا قارىتىلغان ھەر تۈرلۈك زوراۋانلىق ھەرىكەتلىرىنى ئەيىبلەيمىز».
سۇبىيانتو ھىندونېزىيەنىڭ توقۇنۇشنى توختىتىش ئۈچۈن خەلقئارالىق تىرىشچانلىقلارغا قاتنىشىشقا تەييار ئىكەنلىكىنى ئېيتتى. ئۇ: «بىز تىنچلىق ساقلاش قوشۇنى بىلەن تەمىنلەشكە ھازىرمىز» دەپ، دۆلىتىنىڭ ئىككى دۆلەتلىك ھەل قىلىش پىلانىغا بولغان ساداقىتىنى قايتا تەكىتلىدى.
ئۇ يەنە ھىندونېزىيەنىڭ ئېتىراپ قىلىش مەسىلىسىدىكى مەيدانىنىمۇ ئوتتۇرىغا قويدى.
ئۇ ۋەكىللەرگە خىتاب قىلىپ: «ھىندونېزىيە ئىسرائىلىيە پەلەستىن دۆلىتىنى ۋە پەلەستىننىڭ مۇستەقىللىقىنى ئېتىراپ قىلغان ھامان ئىسرائىلىيە دۆلىتىنى دەرھال ئېتىراپ قىلىدىغانلىقىنى ۋە ئىسرائىلىيەنىڭ بىخەتەرلىكى ئۈچۈن بارلىق كاپالەتلەرنى قوللايدىغانلىقىنى جاكارلايدۇ» دېدى.
پرابوۋو ھىندونېزىيەنىڭ مەيدانىنىڭ ئوچۇق ۋە ئېنىق ئىكەنلىكىنى بىلدۈردى.
ئۇ سۆزىدە: «بىز پەلەستىن مەسىلىسىگە دائىر ئىككى دۆلەتلىك ھەل قىلىش پىلانىغا بولغان ساداقىتىمىزنى داۋاملاشتۇرىمىز» دېگەنلەرنى قەيت قىلىپ، «كۆز ئالدىمىزدا يۈز بېرىۋاتقان ئىنسانىي ئاپەت» نى ئاخىرلاشتۇرۇش ئۈچۈن خەلقئارالىق تىرىشچانلىقلاردا بىرلىشىشكە چاقىردى.
ئېتىراپ قىلىش ۋەزىيىتى كۈچەيمەكتە
بۇ ۋەدە ب د ت ئومۇمىي كېڭىشىنىڭ 80-نۆۋەتلىك يىغىنىدا پەلەستىننىڭ ئېتىراپ قىلىنىشىغا قارىتا ۋەزىيەت كۈچىيىۋاتقان بىر پەيتتە بېرىلدى.
بىر كۈن ئىلگىرى ئەنگلىيە ئاۋسترالىيە ۋە كاناداغا قوشۇلۇپ، پەلەستىن دۆلىتىنى رەسمىي ئېتىراپ قىلدى. بۇ قەدەملەر ئىسرائىلىيە ۋە ئامېرىكا قوشما ئىشتاتلىرىنىڭ كەسكىن نارازىلىقىغا ئۇچرىدى.
ئەنگلىيە باش ۋەزىرى كېيىر ستارمېر يەكشەنبە كۈنى ھەمبەھرىلىگەن بىر سىنلىق باياناتىدا بۇ قارارنى ئاقلىدى. ئۇ: «بۇ ھاماس ئۈچۈن بىر مۇكاپات ئەمەس» دەپ، ئېتىراپ قىلىشنىڭ ئىككى دۆلەتلىك ھەل قىلىش پىلانىنى جانلاندۇرۇش ئۈچۈن زۆرۈر بىر قەدەم ئىكەنلىكىنى تەكىتلىدى.
فىرانسىيە، بېلگىيە، مالتا ۋە لىيۇكسېمبۇرگ قاتارلىق باشقا بىر قىسىم ياۋروپا دۆلەتلىرىمۇ يېقىنقى كۈنلەردە پەلەستىننى ئېتىراپ قىلغانلىقىنى ئېلان قىلىپ، بۇ قەدەملەرنى ئىسرائىلىيەنىڭ ئونلىغان يىللاردىن بۇيانقى ئىشغالىيىتىنى ئاخىرلاشتۇرۇشقا قارىتىلغان تېخىمۇ كەڭ كۆلەملىك بىر تىرىشچانلىقنىڭ بىر قىسمى دەپ كۆرسەتتى.
