تۈركىيە، تۆت پەلەستىنلىكنىڭ ئۆلتۈرۈلۈشىدىن كېيىن بېسىۋېلىنغان پەلەستىن زېمىنلىرىدا ئەۋج ئالغان قانۇنسىز يەھۇدىي كۆچمەنلەر تېررورىنى ئەيىبلىدى.
تاشقى ئىشلار مىنىستىرلىقى جۈمە كۈنى ئېلان قىلغان باياناتىدا: «بېسىۋېلىنغان پەلەستىن زېمىنلىرىدا كۈنسېرى ئېشىۋاتقان قانۇنسىز يەھۇدىي كۆچمەنلەر تېررورىنى كۈچلۈك ئەيىبلەيمىز» دېگەن سۆزلەرنى ئىشلەتتى.
مىنىستىرلىق جۈمە كۈنى تۆت پەلەستىنلىكنىڭ «نىتانياھۇ ھۆكۈمىتى تەرىپىدىن جاسارەتلەندۈرۈلگەن يەھۇدىي كۆچمەن تېررورچىلار تەرىپىدىن» ئۆلتۈرۈلۈشىنىڭ، «ئىسرائىلىيە داۋاملاشتۇرۇۋاتقان قىرغىنچىلىق سىياسىتىنىڭ بىر نەتىجىسى» ئىكەنلىكىنى بىلدۈردى.
باياناتتا، پەلەستىن زېمىنلىرىنى بېسىۋالغان كۆچمەن يەھۇدىي تېررورچىلارنىڭ ۋە ئۇلارنى قوللىغۇچىلارنىڭ سادىر قىلغان جىنايەتلىرىنىڭ جازاسىز قالماسلىقى ۋە جاۋابكارلارنىڭ سوت ئالدىدا ھېساب بېرىشىنىڭ كاپالەتكە ئىگە قىلىنىشى ئۈچۈن خەلقئارا جەمئىيەتكە قىلىنغان چاقىرىق قايتا تەكىتلەندى.
بىنيامىن نېتانياھۇ بىلەن مۇداپىئە مىنىستىرى ئىسرائىل كاتز جۈمە كۈنى ئەتىگەندە، بېسىۋېلىنغان غەربىي قىرغاقدىكى قانۇنسىز خاۋات گىلاد ئولتۇراق رايونى يېقىنلىرىدا ئېلىپ بېرىلغان قوراللىق ھۇجۇمدىن كېيىن پەلەستىن يېزىلىرىدا «كەڭ كۆلەملىك ھەربىي ھەرىكەت» باشلاش توغرىسىدا بۇيرۇق بەرگەن ئىدى.
ئانادولۇ ئاگېنتلىقى مۇخبىرلىرىنىڭ يەتكۈزۈشىچە، قانۇنسىز ئىسرائىلىيەلىك كۆچمەنلەر كېيىنچە نابۇلۇس ئۆلكىسىدىكى ساررا ۋە ئۇرىپ يېزىلىرىغا ھۇجۇم قىلىپ، پەلەستىنلىكلەرگە ئائىت ئۆيلەرگە ۋە باشقا مۈلۈكلەرگە ئوت قويۇپ بەرگەن. يېزا ئاھالىسى تاش ئېتىپ ھۇجۇمچىلارغا قارشى تۇرغان.
ئىسرائىلىيەنىڭ 2023-يىلى ئۆكتەبىردە غەززەگە قارىتا ئېغىر ھەربىي ھۇجۇملىرىنى باشلىغىنىدىن بۇيان بېسىۋېلىنغان غەربىي قىرغاقتا زوراۋانلىقلارنىڭ نىسبىتى ئاشتى.
پەلەستىنلىك مەسئۇللارنىڭ مەلۇماتلىرىغا ئاساسلانغاندا بۇ مەزگىلدە ئىسرائىلىيە ئارمىيەسىنىڭ بېسىپ كىرىشلىرى ۋە بۇلاڭ- تالاڭ ھۇجۇملىرى نەتىجىسىدە ئاز دېگەندىمۇ 1182 پەلەستىنلىك ئۆلتۈرۈلدى ۋە مىڭلارچە كىشى يارىلاندى ھەمدە تەخمىنەن 24 مىڭ كىشى قولغا ئېلىندى.
