يۇقىرى دەرىجىلىك ئامېرىكالىق دىپلومات مايكىل رىگاس بۇ ھەپتە تۈركىيەدە ئۆتكۈزۈلىدىغان ۋە پاپا 14-لېئومۇ قاتنىشىدىغان بىرىنچى قېتىملىق ئىزنىك كېڭىشىنىڭ 1700 يىللىقىنى خاتىرىلەش پائالىيەتلىرىگە ۋاشىنگىتونغا ۋاكالىتەن ئىشتىراك قىلىدۇ.
ئامېرىكا قوشما ئىشتاتلىرى تاشقى ئىشلار مىنىستىرلىقى سەيشەنبە كۈنى بايانات ئېلان قىلىپ، مىنىستىرلىقنىڭ باشقۇرۇش ۋە مەنبەلەرگە مەسئۇل مۇئاۋىن مىنىستىرى مايكىل رىگاسنىڭ 27-نويابىردىن 5-دېكابىرغىچە تۈركىيە، ئىراق ۋە قۇددۇستا زىيارەتتە بولىدىغانلىقىنى ئۇقتۇردى.
رىگاس تۈركىيەدىكى مەزگىلىدە، ئىزنىك كېڭىشىنى خاتىرىلەش مۇراسىمىغا قاتنىشىدىغان ئامېرىكا ھەيئىتىگە رىياسەتچىلىك قىلىدۇ ھەمدە ئامېرىكا-تۈركىيە ئىككى تەرەپلىك مۇناسىۋەتلىرىنى ئىلگىرى سۈرۈش ئۈچۈن تۈركىيەلىك مەنسەپداشلىرى بىلەن سۆھبەت ئۆتكۈزىدۇ.
باياناتتا كۆرسىتىلىشىچە، رىگاس يەنە ئىستانبۇل فەنەر رۇم ئورتودوكس پاترىكى بارتولومېيوس بىلەنمۇ كۆرۈشىدۇ.
بىرىنچى ئىزنىك (نىكېيا) كېڭىشى، مىلادىيە 325-يىلى رىم ئىمپېراتورى كونستانتىن تەرىپىدىن چاقىرىلغان بولۇپ، دەسلەپكى خىرىستىيان دۇنياسىنىڭ ھەرقايسى جايلىرىدىن كەلگەن پىسكوپلارنى جەم قىلغان ھەمدە خىرىستىيانلىقنىڭ ئاساسىي ئەقىدىلىرى ھەققىدە ھەل قىلغۇچ قارارلارنىڭ چىقىرىلىشىغا تۈرتكە بولغان.
نىكېيا — ئىستانبۇلغا يېقىن بۇرسا ۋىلايىتىگە قاراشلىق كۆلنىڭ بويىغا جايلاشقان ئىزنىك بازىرىنىڭ قەدىمكى نامىدۇر.
