ئانتونى بلىنكېن ئامېرىكا تاشقى ئىشلار مىنىستىرلىقىدا ئۆتكۈزگەن ئاخىرقى مۇخبىرلارنى كۈتۈۋېلىش يىغىنىدا، غەززەدە ئۇرۇش توختىتىش ئۈچۈن، ئامېرىكانىڭ بىر قانچە ئايدىن بۇيان قاتار ۋە مىسىر بىلەن بىرلىكتە كەسكىن دىپلوماتىيە يۈرگۈزگەنلىكىنى ۋە تەرەپلەرنىڭ كېلىشىم ھاسىل قىلىشىنى قولغا كەلتۈرۈش ئۈچۈن كۆپ تىرىشچانلىق كۆرسەتكەنلىكىنى تەكىتلەپ: «يەكشەنبە كۈنى ئۇرۇش توختىتىشنىڭ كېلىشىمىنىڭ ئىجرا قىلىنىشقا باشلىنىدىغانلىقىغا تولۇق ئىشىنىمەن ۋە بۇنى كۈتۈۋاتىمەن. بۇنداق مۇرەككەپ ۋە نازۇك سۆھبەت جەريانىدا، بەزى مەسىلىلەرنىڭ چىقىشى ھەيران قالارلىق ئىش ئەمەس. ھازىر بۇ توسالغۇلارنى تېز سۈرئەتتە ھەل قىلىۋاتىمىز» دېدى.
بەزى توسالغۇلارنىڭ ئۇرۇش توختىتىشنىڭ ئىجرا قىلىنىشىغا توسقۇنلۇق قىلالمايدىغانلىقىغا ئىشىنىدىغانلىقىنى بىلدۈرگەن بلىنكېن، غەززەدە ئۇرۇش توختىتىشنىڭ پىلانلانغىنىدەك يەكشەنبە كۈنى ئىجرا قىلىنىدىغانلىقىنى ئوتتۇرىغا قويدى.
20-يانۋار ۋەزىپە ئۆتكۈزۈۋالىدىغان دونالد ترامپ ھۆكۈمىتىنىڭمۇ ئامېرىكا پىرېزىدېنتى جو بايدىن لايىھەسىنى سۇنۇپ قوبۇل قىلىنغان كېلىشىمنى قوللايدىغانلىقىنى ئېيتقان بلىنكېن، ترامپ گۇرۇپپىسىنىڭمۇ بۇ مۇساپىگە تۆھپە قوشقانلىقىنى ئېتىراپ قىلىشى كېرەكلىكىنى بىلدۈردى.
ئۇ، ھاماسنىڭ قايتىدىن سۆھبەت ئۈستىلىگە قايتىشى مەسىلىسىدە رايوندىكى تەرەپلەر بىلەن نۇرغۇن قېتىم سۆھبەتلەشكەنلىكىنى ۋە بۇ جەھەتتە جۇمھۇر رەئىس رەجەپ تاييىپ ئەردوغاندىن ياردەم تەلەپ قىلغانلىقىنى تىلغا ئېلىپ: «بۇنىڭدىن باشقا، جۇمھۇر رەئىس ئەردوغانغا ئوخشاش باشقا كىشىلەرنىڭ قېشىغا بېرىپ، تەسىر كۈچىنى ئىشلىتىپ ھاماسنى سۆھبەت ئۈستىلىگە قايتۇرۇپ كېلىشى ۋە كېلىشىمنى ئەمەلگە ئاشۇرۇشقا تىرىشىشىنى تەلەپ قىلدۇق. ئۇمۇ شۇنداق قىلدى» دېگەنلەرنى سۆزلىرىگە ئىلاۋە قىلدى.
