ۋېنېزۇئېلا يەكشەنبە كۈنى ئامېرىكا بىلەن جىددىيچىلىك كۈچىيىۋاتقان بىر پەيتتە، مىللىي بولىۋارلىقلار قوراللىق كۈچلىرىگە 5600 يېڭى ئەسكەرنىڭ قوشۇلغانلىقىنى ئېلان قىلدى.
يەرلىك تاراتقۇلارنىڭ ھۆكۈمەت باياناتىنى نەقىل كەلتۈرۈپ خەۋەر قىلىشىچە، «كۈچىيىۋاتقان ئىمپېرىيالىست تەھدىتلەر» سەۋەبىدىن ئەسكەر قوبۇل قىلىش ئىشلىرى ئېلىپ بېرىلغان بولۇپ، ئامېرىكانىڭ تەھدىتلىرى بىلەن كارىب دېڭىزىغا بىر دېڭىز ئارمىيەسى فىلوتىنىڭ ئورۇنلاشتۇرۇلۇشىغا ئىشارەت قىلىندى.
ئامېرىكا بۇ رايونغا دېڭىز پىيادە ئەسكەرلىرى، ئۇرۇش پاراخوتلىرى، ئۇرۇش ئايروپىلانلىرى، بومباردىمانچى ئايروپىلانلار، سۇ ئاستى پاراخوتلىرى ۋە ئۇچقۇچىسىز ئايروپىلانلارنى ئورۇنلاشتۇرۇپ، يېقىنقى مەزگىلدە لاتىن ئامېرىكىسى مىقياسىدا ھەربىي ھەرىكەتلىرىنى كېڭەيتتى.
يەرلىك تاراتقۇلاردا ئېلان قىلىنغان باياناتتا، يېڭى ئەسكەرلەرنىڭ پىرېزىدېنت نىكولاس مادۇروغا ساداقەت قەسىمى ئىچكەنلىكى تەكىتلەندى ۋە قوراللىق كۈچلەر ۋېنېزۇئېلانىڭ «مۇقىملىقى، تىنچلىقى، بىخەتەرلىكى ۋە كەلگۈسى» نىڭ ئومۇرتقىسى دەپ تەرىپلەندى.
گېنېرال-مايور خاۋيېر خوسې ماركانو تاباتا دۆلەت تېلېۋىزىيەسى VTV غا ھەربىي مەشىقلەرنىڭ كۆچەيگەنلىكىنى ئېيتىپ: «ھازىرقى ۋاقىتتا، ئىمپېرىيالىزم دۆلىتىمىزگە قانۇنسىز، ئۆزبېشىمچى، يالغانلارغا تولغان ۋە ھەددىدىن ئاشقان شەكىلدە تەھدىت سېلىۋاتقاندا، مىڭلىغان پۇقرالىرىمىز، بولۇپمۇ ياشلار مىللىي بولىۋارلىقلار قوراللىق كۈچلىرىگە قوشۇلماقتا» دېدى.
رەسمىي سانلىق مەلۇماتلار ۋېنېزۇئېلادا تەخمىنەن 200 مىڭ ئەسكەر، 200 مىڭ ساقچى خادىمى ۋە مىليونلىغان زاپاس خەلق ئەسكەرلىرى بارلىقىنى كۆرسىتىدۇ.
ئامېرىكا سېنتەبىر ئېيىدىن بېرى رايوندا زەھەرلىك چېكىملىك توشۇغانلىقىدىن گۇمانلانغان كېمىلەرگە قارىتا ئەڭ ئاز دېگەندە 22 قېتىم ھۇجۇم قىلدى. ھۇجۇملاردا كەم دېگەندە 87 كىشى ئۆلدى.
ئامېرىكا پىرېزىدېنتى دونالد ترامپ، يېقىندا ۋېنېزۇئېلالىق زەھەرلىك چېكىملىك ئەتكەسچىلىكى تورلىرىنى «قۇرۇقلۇقتىن» نىشانلاشقا باشلايدىغانلىقى ھەققىدە ئاگاھلاندۇردى.
