باش مىنىتىر مىقاتىنىڭ ئىشخانىسى بايانات ئېلان قىلىپ، لىۋان باش مىنىستىرى مىقاتىنىڭ ئىسرائىلىيە بىلەن ھاسىل قىلىنغان ئۇرۇش توختىتىش كېلىشىمىنى نازارەت قىلىدىغان «ئۇرۇش توختىتىشقا نازارەتچىلىك قىلىش كومىتېتى» ئەزالىرى باش مىنىستىرلىق مەھكىمىسىدە كۆرۈشكەنلىكىنى ئۇقتۇردى.

يىغىنغا لىۋان ئارمىيەسى باش ئىشتاب باشلىقى جوسېف ئەۋن، ئۇرۇش توختىتىشنى كۆزىتىش كومىتېتى رەئىسى، ئامېرىكالىق مايور گېنېرال جاسپر جېففېرس، فىرانسىيەلىك مايور گېنېرال گۇيلام پونچىن، لىۋان ئارمىيەسىنىڭ جەنۇبىي لىتانى بۆلىكى قوماندانى گېنېرال ئېدگار لاۋندىس، ب د ت نىڭ لىۋاندا تۇرۇشلۇق ۋاقىتلىق تىنچلىق ساقلاش قىسىملىرى باشلىقى ۋە قوماندانى گېنېرال ئارولدو لازارو قاتارلىقلار قاتناشتى.

يىغىندا لىۋان باش مىنىستىرى مىقاتى ئىسرائىلىيەدىن ئۇرۇش توختىتىش كېلىشىمىگە خىلاپلىق قىلىشنى توختىتىپ، لىۋاننىڭ جەنۇبىي قىسىمىدىكى بېسىپ كىرگەن رايونلاردىن دەرھال چېكىنىپ چىقىپ كېتىشىنى تەلەپ قىلدى ۋە سۆزىنى داۋاملاشتۇرۇپ: «لىۋان كېلىشىمدىكى ماددىلارغا قەتئىي ئەمەل قىلىۋاتقان بولسىمۇ، ئىسرائىلىيە ئۇرۇش توختىتىش كېلىشىمىگە داۋاملىق خىلاپلىق قىلىۋاتىدۇ. بۇنى قوبۇل قىلغىلى بولمايدۇ» دېدى.

ئۇ تۈنۈگۈن لىۋاننىڭ جەنۇبىنى زىيارەت قىلغانلىقىنى تىلغا ئېلىپ، مۇقىملىقنى كۈچەيتىپ، سەرگەردانلارنىڭ يۇرتىغا قايتىشىغا كاپالەتلىك قىلىش كېرەكلىكىنى بىلدۈردى.

مىقاتى ئۇرۇش توختىتىشقا نازارەتچىلىك قىلىش كومىتېتىنى ئۇرۇش توختىتىش شەرتلىرىگە رىئايە قىلىشى ئۈچۈن ئىسرائىلىيەگە بېسىم ئىشلىتىشكە چاقىردى.

لىۋان سەھىيە مىنىستىرلىقىنىڭ ئىستاتىستىكىسىغا ئاساسلانغاندا، 2023-يىلى 10-ئاينىڭ 8-كۈنىدىن بۇيان، ئىسرائىلىيەنىڭ ھۇجۇملىرىدا ئاز دېگەندىمۇ 4061 ئادەم قازا قىلغان، 16661 ئادەم يارىلانغان.

لىۋان بىلەن ئىسرائىلىيە ئوتتۇرىسىدا ھاسىل قىلىنغان ئۇرۇش توختىتىش كېلىشىمى شۇ يەر ۋاقتى 27-نويابىر چارشەنبە سائەت 4:00 دە (تۈركىيە ۋاقتى سائەت 5:00) كۈچكە ئىگە بولدى.

كېلىشىمنىڭ ئىككىنچى ماددىسىدا: «لىۋان ھۆكۈمىتى ئاللاھ پارتىيەسى ياكى لىۋان زېمىنىدىكى ھەرقانداق قوراللىق تەشكىلاتنىڭ ئىسرائىلىيەگە قارشى ھەربىي ھەرىكەت قىلىشىنى توسىدۇ، ئىسرائىلىيە لىۋاندىكى پۇقرالار، ھەربىي ئىشلار ياكى دۆلەت ئىگىدارچىلىقىدىكى نىشانلارغا قۇرۇقلۇق، دېڭىز ۋە ھاۋادىن ھۇجۇم قىلمايدۇ» دېيىلگەن.

كېلىشىمگە ئاساسەن، لىۋان ئارمىيەسى 60 كۈن ئىچىدە باسقۇچقا بۆلۈپ لىۋاننىڭ جەنۇبىدىكى ئىسرائىلىيە ئىشغال قىلغان رايونلارغا ئورۇنلاشتۇرۇلىدىكەن.