ترامپ ھاماسنىڭ بارلىق گۆرۈگە ئېلىنغانلارنى قويۇپ بېرىشى ۋە ئىسرائىلىيەنىڭمۇ ئەسىرلەرنى قويۇپ بېرىشكە باشلىشى بىلەن، ئىسرائىلىيەنىڭ غەززەدە ئېلىپ بارغان ئۇرۇشىنىڭ ئاخىرلاشقانلىقىنى ئېلان قىلدى.
ئامېرىكا پىرېزىدېنتى دونالد ترامپ دۈشەنبە كۈنى ئېلان قىلغان باياناتىدا، ئىسرائىلىيەنىڭ قورشاۋ ئاستىدىكى غەززەگە قارىتىلغان ئۇرۇشىنىڭ رەسمىي ئاخىرلاشقانلىقىنى ئېلان قىلدى. بۇ بايانات، پەلەستىن قارشىلىق كۆرسىتىش ھەرىكىتى (ھاماس) نىڭ دېڭىز قىرغىقى رايونىدا تۇتۇپ تۇرۇۋاتقان 20 نەپەر ئىسرائىلىيەلىك تۇتقۇننى قويۇپ بېرىشىدىن بىرنەچچە مىنۇت كېيىنلا ئېلان قىلىندى.
بىر مۇخبىرنىڭ ئۇرۇشنىڭ ئاخىرلاشقان ياكى ئاخىرلاشمىغانلىقى توغرىسىدىكى سوئالىغا، ترامپ ئىسرائىلىيە پارلامېنتى ئەزالىرىغا سۆز قىلىشقا تەييارلىنىۋاتقاندا قىسقىچە «ھەئە» دەپ جاۋاب بەردى.
ئانادولۇ ئاگېنتلىقى مۇخبىرىنىڭ خەۋىرىگە قارىغاندا، پەلەستىن قارشىلىق كۆرسىتىش ھەرىكىتى (ھاماس) نىڭ ھەربىي قانىتى ئىززەددىن ئەلقەسسام قىسىملىرى دۈشەنبە كۈنى 20 نەپەر ئىسرائىلىيەلىك تۇتقۇننىڭ قويۇپ بېرىلىش جەريانىنىڭ تاماملىغانلىقىنى ئېلان قىلدى.
تۇتقۇنلار غەززەدە ئىككى گۇرۇپپا ھالىتىدە قىزىل كىرېست جەمئىيىتىنىڭ ئەترەتلىرىگە تاپشۇرۇپ بېرىلدى.
ترامپنىڭ ئىسرائىلىيە بىلەن ھاماس ئوتتۇرىسىدا قولغا كەلتۈرۈلگەن 20 ماددىلىق ئۇرۇش توختىتىش كېلىشىمى دائىرىسىدە، ئىسرائىلىيەلىك تۇتقۇنلارنىڭ قويۇپ بېرىلىشىگە جاۋابەن، مۇددەتسىز قاماق جازاسى بېرىلگەن 250 تۇتقۇننى ئۆز ئىچىگە ئالغان 1968 پەلەستىنلىك ئەسىرنىڭمۇ قويۇپ بېرىلىشى داۋام قىلماقتا.
پەلەستىنلىك ئەسىرلەر ئاخبارات ئىشخانىسىنىڭ بىلدۈرۈشىچە، پەلەستىنلىك ئەسىرلەرنى ئېلىپ ماڭغان ئاپتوبۇسلار دۈشەنبە كۈنى ئىسرائىلىيە تۈرمىلىرىدىن غەززە ۋە ئىشغال ئاستىدىكى ئىيوردان دەرياسىنىڭ غەربىي قىرغىقىغا قاراپ يولغا چىققان.
