ئاۋستىرالىيە ساقچىلىرى سىدنېينىڭ بوندى ساھىلىدىكى قوراللىق ھۇجۇمنىڭ ئىككى گۇماندارىنىڭ ئاتا - بالا ئىكەنلىكىنى، تەپتىشلەرنىڭ باشقا گۇماندارلارنى ئىزدىمەۋاتقانلىقىنى بىلدۈردى.
يېڭى جەنۇبىي ۋالېس ئۆلكىلىك ساقچى ئىدارىسىنىڭ كومىسسارى مال لانيون دۈشەنبە كۈنى مۇخبىرلارغا، ھۇجۇمچىلارنىڭ 50 ياشلىق بىر ئەر ۋە ئۇنىڭ 24 ياشلىق ئوغلى ئىكەنلىكىنى، دادىسىنىڭ ۋەقە يۈز بەرگەن جايدا ساقچىلار تەرىپىدىن ئېتىپ ئۆلتۈرۈلگەنلىكىنى، ئوغلىنىڭ بولسا دوختۇرخانىدا بولۇپ، ئەھۋالىنىڭ ئېغىر ئىكەنلىكىنى بىلدۈردى.
لانيون ۋەقەدە باشقا جاۋابكار يوقلۇقىنى بىلدۈرۈپ: «بىز باشقا بىر ھۇجۇمچىنى ئىزدىمەيۋاتىمىز. ھۇجۇمنى ئىككى كىشىنىڭ ئېلىپ بارغانلىقىغا ئىشىنىمىز» دېدى.
ساقچى تەرەپنىڭ بەرگەن مەلۇماتىغا قارىغاندا، ئۆلگەنلەرنىڭ سانىمۇ رايوندىن كەلگەن دەسلەپكى خەۋەرلەرگە سېلىشتۇرغاندا كۆپەيگەن. يارىلانغانلاردىن ئەھۋالى ئېغىر بولغانلارنىڭ ھاياتىدىن ئايرىلىشى بىلەن ھۇجۇمدا قازا قىلغانلار سانى 15 كە يەتكەن بولۇپ، يارىلانغانلار سانى 39 ئىكەن. بۇ سان ئۆلتۈرۈلگەن ۋە يارىلىنىپ قولغا چۈشكەن ھۇجۇمچىلارنى ئۆز ئىچىگە ئالمايدىكەن.
كومىسسار لانيون گۇماندارلاردىن دادىسىنىڭ تىزىمغا ئېلىنغان ئالتە دانە قورالغا ئىگە، ئىجازەتنامىسى بار قورال ئىشلەتكۈچى ئىكەنلىكىنى ئېيتتى. ساقچىلار ۋەقە يۈز بەرگەن جايدا ھەمدە بوننىرىگ ۋە كامپشى ئەتراپىدىكى ئىككى ئۆيدە كېچىچە ئېلىپ بارغان ئاختۇرۇشلار داۋامىدا جەمئىي ئالتە دانە قورالنى قولغا چۈشۈردى. قولغا چۈشۈرۈلگەن قوراللارنىڭ ھۇجۇمدا ئىشلىتىلگەن قوراللار ياكى ئەمەسلىكىنى دەلىللەش ئۈچۈن باللىستىك ۋە ئەدلىيەلىك تەكشۈرۈشلەرنىڭ داۋاملىشىۋاتقانلىقى بىلدۈرۈلدى.
دۆلەتلىك رادىيو – تېلېۋىزىيە ABC نىڭ خەۋىرىگە قارىغاندا، ساقچىلار ھۇجۇمچىلاردىن بىرىنىڭ ئاپتوموبىلىدىن پارتلاتقۇچ ئۈسكۈنىلەرنىمۇ تاپقان.
«ھەقىقىي قەھرىمان»
ئاۋسترالىيە باش مىنىستىرى ئانتونىي ئالبانېس ھۇجۇمنى ئەيىبلەپ «تېررورىزم» دەپ ئاتىدى.
ئالبانېس بۇ ھەقتە ئېلان قىلغان باياناتىدا مۇنداق دېدى:
«بۇ، خۇشال - خۇرام ئۆتۈشى كېرەك بولغان خانۇكا بايرىمىنىڭ تۇنجى كۈنىدە، ئاۋستىرالىيەدىكى يەھۇدىيلارغا قارىتىلغان نىشانلىق ھۇجۇمدۇر. بۇ نەپرەت، زوراۋانلىق ۋە تېررورىزمغا دۆلىتىمىزدە ئورۇن يوقتۇر.»
دائىرىلەر ھۇجۇم جەريانىدا ياخشى ئىش قىلغان بىر نەق مەيدان شاھىتىنىمۇ ماختىدى. كۆرۈنۈشلەردە، 43 ياشلىق ئەھمەد ئەلئەھمەد ئىسىملىك كىشىنىڭ، قوراللىق ھۇجۇمچىلاردىن بىرىگە قاراپ يۈگۈرۈپ بېرىپ، ئۇنىڭ قولىدىكى قورالنى تارتىۋالغانلىقى ۋە ھۇجۇمچىنى چېكىنىشكە مەجبۇر قىلغانلىقى كۆرۈلىدۇ.
بىر كۆكتات دۇكىنىنىڭ خوجايىنى ۋە ئىككى بالىنىڭ دادىسى بولغان ئەلئەھمەد، قولى ۋە بىلىكىگە تەگكەن ئوق سەۋەبىدىن ئوپېراتسىيە قىلىنغان بولۇپ، ئائىلىسىنىڭ يەرلىك تاراتقۇلارغا ئېيتىشىچە، ئۇ ھازىرمۇ دوختۇرخانىدا ئىكەن.
يېڭى جەنۇبىي ۋالېس ئۆلكسىنىڭ باش مىنىستىرى كىرىس مىننىس ئەلئەھمەدنىڭ بۇ ھەرىكىتىنى قەھرىمانلىق دەپ ئاتىدى.
مىننىس ئەلئەھمەد ھەققىدە توختىلىپ: «ئۇ كىشى ھەقىقىي بىر قەھرىمان. جامائەتكە قارىتىپ ئوق چىقىرىۋاتقان بىر قوراللىق كىشىنىڭ يېنىغا ئېتىلىپ بېرىپ، ئۇنى يالغۇز بىر تەرەپ قىلغان ۋە نۇرغۇنلىغان كىشىنىڭ ھاياتىنى قۇتقۇزۇپ قېلىش ئۈچۈن خەتەرگە تەۋەككۈل قىلغان بىر كىشىدۇر» دېدى.
