كاتز ئىسرائىلىيەنىڭ 14-قانال تېلېۋىزىيەسىگە بەرگەن زىيارىتىدە، كۈن تەرتىپتىكى ئۆزگىرىشلەر ۋە ئىران بىلەن ئوتتۇرىغا چىققان كىرىزىسلار ئۈستىدە توختالدى.

ئىراننى بىۋاسىتە نىشانغا ئالغان كاتز: «ئەگەر ئىران ئىسرائىلىيەگە ھۇجۇم قىلسا ۋەيران قىلغۇچ زەربىگە ئۇچرايدۇ، بۇنى ئۇلارمۇ ئىنتايىن ياخشى بىلىدۇ» دېگەن سۆزلەرنى ئىشلەتتى.

يەرلىك تاراتقۇلارنىڭ «ھەربىي ئۇتۇقلارنى» كۆرمەسكە سالغانلىقىنى ئىلگىرى سۈرگەن كاتز، ھۆكۈمەتنىڭ قولغا كەلتۈرگەن نەتىجىلىرىنى جەمئىيەت بىلەن ھەمبەھىرلىنىشنى داۋاملاشتۇرىدىغانلىقىنى بىلدۈردى.

كاتز «تىلغا ئېلىنغان ئۇتۇقلار» ئارىسىدا ئىران رەھبىرى ئايەتۇللاھ ئالى ھامانې ۋە باشقا ئالىي دەرىجىلىك ئىرانلىق مەسئۇللارنىڭ ئۆلتۈرۈلۈشىنىمۇ كۆرسەتتى.

خەۋەردە يەنە، ئىسرائىلىيە بىخەتەرلىك مەسئۇللىرىنىڭ ئامېرىكا پىرېزىدېنتى دونالد ترامپنىڭ ئىرانغا قارىتا پىلانلانغان كەڭ كۆلەملىك ھەربىي ھەرىكەتنى ئەمەلدىن قالدۇرۇش قارارىغا نارازىلىق بىلدۈرگەنلىكى قەيت قىلىندى.

ئىسرائىلىيە مەتبۇئاتىدا ئامېرىكانىڭ ئىرانغا كەڭ كۆلەملىك ھۇجۇم قىلىش ئىمكانىيىتىنى كۈن تەرتىپكە كەلتۈرگەنلىكى، ئىسرائىلىيەنىڭمۇ مۇداپىئە ئاگاھلاندۇرۇش دەرىجىسىنى ئەڭ يۇقىرى سەۋىيەگە كۆتۈرگەنلىكى بىلدۈرۈلگەن ئىدى.

ترامپ بولسا 31-ئىيۇلدا ئېلان قىلغان باياناتىدا، ئامېرىكانىڭ «ئىران بۇنىڭدىن كېيىن بەرداشلىق بەرەلمەيدىغان ھالغا كەلگۈچە ئىنتايىن ئېغىر زەربىلەرنى بېرىدىغانلىقىنى» ئوتتۇرىغا قويغان ھەمدە ئېلىپ بېرىلىۋاتقان جەرياننىڭ ئامېرىكا ئۈچۈن «ئىنتايىن ياخشى كېتىۋاتقانلىقىنى» ئىلگىرى سۈرگەن ئىدى.