ئىران تاشقى ئىشلار مىنىستىرلىقى باياناتچىسى ئىسمائىل بەقايى، شەنبە كۈنى ئېلان قىلغان باياناتىدا، تېخنىكىلىق مۇزاكىرىلەردىن كېيىن ئىراننىڭ ھۆرمۈز بوغۇزى ئۈچۈن تەييارلانغان قاتناش خەرىتىسى مەسىلىسىدە ئومان بىلەن كېلىشىم ھاسىل قىلغانلىقىنى ئۇقتۇردى.
ئىسمائىل بەقايى Defa Press غا بەرگەن باياناتىدا، ئىستراتېگىيەلىك دېڭىز يولىغا قىرغىقى بار ئىككى دۆلەت بولغان ئىران ۋە ئوماننىڭ، بىخەتەر قاتناش لىنىيەلىرىنىڭ قۇرۇلۇشىغا مۇناسىۋەتلىك 18-ئىيۇندا ئىمزالانغان پىكىر بىرلىكى كېلىشىمىدىن كېيىن ئۈچ ئاي ئىلگىرى زىچ مۇزاكىرىلەرنى باشلىغانلىقىنى ئەسكەرتتى. بەقايى: «ئامېرىكانىڭ توسالغۇلىرىغا قارىماي سۆھبەتلەر ئاخىرقى ئۈچ ھەپتىدە ئىجابىي بىر ئىلگىرىلەشنى قولغا كەلتۈردى ۋە قاتناش خەرىتىسى ئۈستىدە كېلىشىم ھاسىل قىلىندى» دېدى.
مەزكۇر پىلاننىڭ تاشقى ئىشلار مىنىستىرلىقى رىياسەتچىلىكىدە ئىران مۇداپىئە، بىخەتەرلىك ۋە مۇھىت ئاسراش مەسئۇللىرىنىڭ ئىشتىراك قىلىشى بىلەن تەييارلانغانلىقى قەيت قىلىندى.
ئىككى تەرەپنىڭ تېھران ۋە ماسكات تەرىپىدىن ئېلان قىلىنىدىغان ئورتاق باياناتنىمۇ ئۆز ئەچىگە ئالغان، ئەمما تېخى ئېنىقلاشمىغان مەسىلىلەرنى مۇزاكىرە قىلىشنى داۋاملاشتۇرىۋاتقانلىقىنى بىلدۈرگەن بەقايى، مۇزاكىرە مۇساپىسى تاماملانغىچە ئىككى دۆلەت ئوتتۇرىسىدىكى ئالاقىلەرنىڭ داۋاملىشىدىغانلىقىنى ئۇقتۇردى. بەقايى، ئىران-ئومان تەرتىپىنىڭ ئىككى دۆلەتنىڭ ئېگىلىك ھوقۇقلىرىنى قوغداش بىلەن بىرگە پاراخوتلارنىڭ بوغۇزدىن بىخەتەر ئۆتۈشىنى كاپالەتكە ئىگە قىلىشنى مەقسەت قىلغان مۇستەقىل بىر كېلىشىم ئىكەنلىكىنى ئالاھىدە تەكىتلىدى.
ئىران تاشقى ئىشلار مىنىستىرلىقى باياناتچىسى بوغۇزدا بىخەتەرلىكنىڭ تولۇق مەنىسى بىلەن قايتىدىن تىكلىنىشىنىڭ ۋە ئادەتتىكى سودا پاراخوتلىرى قاتنىشىنىڭ باشلىنىشىنىڭ، ئامېرىكانىڭ قانۇنسىز ھەرىكەتلىرىگە، ھەربىي تەھدىتلىرىگە ۋە دېڭىز قامىلىغا خاتىمە بېرىشىگە شۇنداقلا ئاخىرقى ئالتە ئايدا خىلاپلىق قىلغان مەجبۇرىيەتلىرى ئۈچۈن تۆلەم تۆلىشىگە باغلىق ئىكەنلىكىنى تەكىتلىدى.
مەزكۇر سۆھبەتلەر، تېھران ۋە ماسكاتنى ھۆرمۈز بوغۇزى ئۈچۈن يېڭى بىر قاتناش لىنىيەسى رامكىسى بەرپا قىلىش بىلەن ۋەزىپىلەندۈرگەن ئىران-ئامېرىكا پىكىر بىرلىكى ھۆججىتى دائىرىسىدە باشلانغان تېخنىكىلىق مۇزاكىرىلەرنىڭ بىر پارچىسى سۈپىتىدە يۈرگۈزۈلمەكتە. ئىران ۋە ئومان تىرانسپورت لىنىيەلىرى ئۈستىدىكى سۆھبەتلەرنى داۋاملاشتۇرماقتا، يەنە بىر تەرەپتىن تېھران ھۆكۈمىتى ئىستراتېگىيەلىك دېڭىز يولىنىڭ قايتىدىن ئېچىلىشىغا مۇناسىۋەتلىك ھەرقانداق بىر قارارنىڭ ئامېرىكانىڭ پىكىر بىرلىكى ھۆججىتى دائىرىسىدىكى مەجبۇرىيەتلىرىنى ئورۇنلىشىغا باغلىق ئىكەنلىكىنى تەكرارلىماقتا.
