ئامېرىكا پىرېزىدېنتى دونالد ترامپ ئۇكرائىنانىڭ ئىتتىپاقداشلىرى ئارىسىدا پىلاننىڭ ئۇكرائىنانىڭ ھەربىي پائالىيەتلىرىنى چەكلەيدىغان تەكلىپلىرىگە قارىتا ئەندىشىلەر ئوتتۇرىغا چىققاندىن كېيىن سۆز قىلىپ، «تىنچلىققا ئېرىشىشنى خالايمىز. بۇ ناھايىتى بۇرۇنلا ئەمەلگە ئېشىشى كېرەك ئىدى» دېدى.
دونالد ترامپ، رۇسىيە-ئۇكرائىنا ئۇرۇشىنى ئاخىرلاشتۇرۇش ئۈچۈن ئامېرىكا تەرىپىدىن تەييارلانغان 28 ماددىلىق بىر پىلاننىڭ، ئۇكرائىنا ۋە ئىتتىپاقداشلىرى ئارىسىدا ئەندىشە يارىتىشىدىن كېيىن، بۇنىڭ ئامېرىكانىڭ «ئاخىرقى تەكلىپى» بولمايدىغانلىقىنى ئېيتتى.
ترامپ شەنبە كۈنى ئاق سارايدىن ئايرىلىش جەريانىدا مۇخبىرلارغا بەرگەن باياناتىدا: «تىنچلىقنى ئەمەلگە ئاشۇرۇشنى خالايمىز. تېخىمۇ بۇرۇن بولۇشى كېرەك ئىدى. ئۇكرائىنا بىلەن رۇسىيە ئارىسىدىكى ئۇرۇش ھېچقاچان يۈز بەرمەسلىكى كېرەك ئىدى» دېدى.
«بۇنى ئاخىرلاشتۇرۇشقا تىرىشىۋاتىمىز. قانداقلا بولمىسۇن، ئاخىرلاشتۇرۇشقا مەجبۇرمىز» دېگەن ترامپ، ئەگەر ئۇكرائىنا پىرېزىدېنتى ۋولودىمىر زېلېنسكىي پىلاننى رەت قىلسا، ئۇنىڭ «بارلىق كۈچى بىلەن داۋاملىق ئۇرۇش قىلىۋېرىشى مۇمكىنلىكىنى» قوشۇمچە قىلدى.
لايىھە ئۇكرائىنانىڭ رۇسىيەگە قوشۇمچە زېمىن بېرىشىنى، ئارمىيەسىنىڭ كۆلىمىنى چەكلىشىنى ۋە ناتوغا قاتنىشىش تەشەببۇسىدىن رەسمىي ۋاز كېچىشىنى تەلەپ قىلىدىغاندەك كۆرۈنمەكتە.
ترامپ ئۇكرائىنا تەرەپتىكى سۆھبەتدىشى ۋولودىمىر زېلېنسكىيگە جاۋاب بېرىش ئۈچۈن پەيشەنبە كۈنىگىچە مۆھلەت بەردى.
زېلېنسكىي بولسا مەسىلىگە مۇناسىۋەتلىك ھەمبەھرىلىگەن بىر سىندا، قىيىن بىر تاللاشقا دۇچ كەلگەنلىكىنى، بۇنىڭ «غۇرۇرىمىزنى يوقىتىش ياكى مۇھىم بىر شېرىكنى يوقىتىپ قويۇش خەۋپى» ئىكەنلىكىنى ئېيتتى.
شەنبە كۈنى توققۇز ياۋروپا دۆلىتىنىڭ رەھبەرلىرى بىلەن ياپونىيە، كانادا ۋە يۇقىرى دەرىجىلىك ياۋروپا ئىتتىپاقى ئەمەلدارلىرى، پىلاننىڭ ئۇكرائىنا قوراللىق كۈچلىرى ئۈستىدىكى تەكلىپ قىلىنغان چەكلىمىلىرىدىن ئەندىشە قىلىدىغانلىقىنى بىلدۈرۈپ، بۇنىڭ «ئۇكرائىنانى كەلگۈسىدىكى بىر ھۇجۇمغا قارشى ئاجىز ھالەتتە قالدۇرىدىغانلىقى» ھەققىدە ئاگاھلاندۇردى.
رۇسىيە، 2022-يىلى فېۋرالدا بىر قانچە ئوخشىمىغان يۆنىلىشتىن ئۇكرائىنا زېمىنلىرىغا ھۇجۇم قىلغان ۋە بۇنى ئۇكرائىنانى «ناتسىستلاردىن تازىلاش» ۋە قورالسىزلاندۇرۇش ئۈچۈن قىلغانلىقىنى بىلدۈرگەن ئىدى.
موسكۋا، ئۇكرائىنا ئارمىيەسىنىڭ چەكلىنىشى ۋە ئۇكرائىنانىڭ ناتو ئەزالىقىنىڭ توسۇلۇشىدىن سىرت، رۇسچىنىڭ ئۇكرائىنانىڭ رەسمىي تىللىرىدىن بىرى بولۇشىنى ۋە دۆلەتنىڭ مۇھىم مىقداردىكى زېمىنىنىڭ رۇسىيەگە بېرىلىشىنى تەلەپ قىلماقتا.
