ئىران پىرېزىدېنتى مەسئۇد پەزەشكىيان سەيشەنبە كۈنى ئېلان قىلغان باياناتىدا، تېھران ھاكىمىيىتىنىڭ «تاجاۋۇزچىلار» قىلمىشلىرىدىن تولۇق پۇشايمان قىلغۇچە قارشىلىق كۆرسىتىشنى داۋاملاشتۇرىدىغانلىقىنى بىلدۈردى. پەزەشكىيان ئاممىۋى ئورتاقلىشىش تور بېتى X سەھىپىسىدە ئېلان قىلغان باياناتىدا مۇنداق دېدى:
«ئىران ھەر ۋاقىت ئۇرۇشقا قارشى تۇرۇپ كەلدى؛ خەلقنىڭ مەنپەئەتىنى ۋە رايونلۇق خەۋپسىزلىكنى قوغداش ئۈچۈن ئۇرۇش تەرەپدارى بولۇشتىن ئۆزىنى قاچۇردى. ئەمما تاجاۋۇزچىلار تاكى قىلمىشلىرىدىن تولۇق پۇشايمان قىلغانغا قەدەر، بۈيۈك ئىران مىللىتىنىڭ ھوقۇقىنى قەتئىيلىك بىلەن قوغدايدۇ.»
بۇ بايانلار ئامېرىكا بىلەن ئىران ئوتتۇرىسىدىكى ئۇرۇش ۋە جىددىيچىلىك ئەۋج ئالغان بىر پەيتتە ئېلان قىلىندى.
ئىران تاشقى ئىشلار مىنىستىرى ئابباس ئاراقچى ياپونىيە تاشقى ئىشلار ۋەزىرى توشىمىتسۇ موتېگى بىلەن ئۆتكۈزگەن تېلېفون سۆھبىتىدە، ۋاشىنگتوننىڭ ئىسلاماباد كېلىشىمى بويىچە مەجبۇرىيەتلىرىنى ئادا قىلىشىنىڭ جىددىيچىلىكنى پەسەيتىدىغانلىقىنى ئەسكەرتتى. ئاراقچى يەنە، ئىران بىلەن ئوماننىڭ ھورمۇز بوغۇزىدىن ۋاقىتلىق ئۆتۈش يولى بەرپا قىلىش سۆھبىتىدە مۇھىم ئىلگىرىلەشلەرنى قولغا كەلتۈرگەنلىكىنىمۇ سۆزلىرىگە ئىلاۋە قىلدى.
