تۈركىيە جۇمھۇرىيىتى تاشقى ئىشلار مىنىستىرلىقى ئۆزىنىڭ ئىجتىمائىي ئالاقە سۇپىسىدا ئۇچۇر ھەمبەھرىلەپ، قىبرىس تىنچلىق ھەرىكىتىنىڭ 52 يىللىق خاتىرىسىنى ئىپتىخارلىق بىلەن تەبرىكلەيدىغانلىقىنى ھەمدە تۈركىيەنىڭ كەلگۈسىدىمۇ شىمالىي قىبرىس تۈرك جۇمھۇرىيىتى (ش ق ت ج) نىڭ مەنپەئەتلىرىنى قوغدايدىغانلىقىنى ئېلان قىلدى.
مىنىستىرلىقنىڭ ئېلان قىلغان باياناتىدا مۇنداق دېيىلدى: «قىبرىس تۈرك خەلقىنىڭ ئەركىنلىك كۈرىشىگە تاج كىيدۈرگەن قىبرىس تىنچلىق ھەرىكىتىنىڭ 52 يىللىق خاتىرىسىنى ئىپتىخارلىق بىلەن تەبرىكلەيمىز. بۇنىڭدىن تولۇق 52 يىل ئىلگىرى تۈركىيە، 1960-يىللىق كاپالەتچىلىك كېلىشىمىدىن كەلگەن ھوقۇق ۋە مەجبۇرىيەتلىرى دائىرىسىدە ھەرىكەتكە ئۆتۈپ، قىبرىس تۈركلىرىنىڭ جىسمانىي بىخەتەرلىكىنى ۋە ئارالدىكى مەۋجۇتلۇقىنى كاپالەت ئاستىغا ئالغان ئىدى.»
ئۇچۇردا، بۈگۈنكى كۈندە قىبرىس تۈرك خەلقىنىڭ ش ق ت ج نىڭ كۈنلۈكى ئاستىدا، ئەركىن لەپىلدەۋاتقان بايرىقى ئاستىدا قەددى تىك، خاتىرجەملىك ۋە بىخەتەرلىك ئىچىدە ياشاۋاتقانلىقى تەكىتلەندى. شۇنداقلا، ئانا ۋەتىنى ۋە كاپالەتچىسى بولغان تۈركىيەنىڭ تۈنۈگۈنكىگە ئوخشاشلا بۈگۈن ۋە كەلگۈسىدىمۇ قىبرىس تۈركلىرىنىڭ ئەزەلدىن تارتىپ داۋاملىشىپ كېلىۋاتقان ھوقۇقى بولغان ئىگىلىك ھوقۇق باراۋەرلىكى ۋە خەلقئارالىق سالاھىيىتىنىڭ ئېتىراپ قىلىنىشى ئۈچۈن پۈتۈن كۈچى بىلەن خىزمەت قىلىشنى داۋاملاشتۇرىدىغانلىقى قايتا ئەسكەرتىلدى.
باياناتنىڭ ئاخىرىدا يەنە: «قىبرىستا تىنچلىق ئورناتقان، مىللىي دەۋايىمىز يولىدا كۆز يۇمماستىن شېھىتلىك دەرىجىسىگە يەتكەن مەھمەتچىكلىرىمىزنى (ئەسكەرلىرىمىزنى) ۋە مۇجاھىتلىرىمىزنى رەھمەت بىلەن ئەسلەيمىز، غازىلىرىمىزغا چەكسىز مىننەتدارلىقىمىزنى بىلدۈرىمىز» دېگەن سۆزلەرگە ئورۇن بېرىلدى.
