ئىران تاشقى ئىشلار مىنىستىرلىقى باياناتچىسى ئىسمائىل بەقايرى، ئامېرىكا بىلەن بولغان سۆھبەتلەرنىڭ پاكىستاننىڭ ۋاسىتچىلىقىدا داۋاملىشىۋاتقانلىقىنى ئېيتتى. «مېھر خەۋەر ئاگېنتلىقى» نىڭ يەتكۈزۈشىچە، بەقايرى دۈشەنبە كۈنى بەرگەن باياناتىدا: «ئۇراننى قويۇقلاشتۇرۇش ۋە ئۇران ماددىلىرىغا ئائىت قۇرۇق گەپلەرنى ئوتتۇرىغا قويدى. بىز ئۆز نۆۋىتىدە بۇنىڭ ھېچقانداق ئاساسى يوقلۇقىنى بىلدۈردۇق» دېگەن بولۇپ، ئۇ يەنە: «ئامېرىكالىقلار تەكلىپلەر سۇندى، بىز ئۆز كۆز قاراشلىرىمىزنى يەتكۈزدۇق» دېگەنلەرنىمۇ سۆزلىرىگە ئىلاۋە قىلدى.
بەقايرى ئامېرىكا ۋە بەھرەيننىڭ ھورمۇز بوغۇزىغا مۇناسىۋەتلىك تەكلىپ بەرگەن قارارىغا نارازىلىق بىلدۈرۈپ، بىرلەشكەن دۆلەتلەر تەشكىلاتى خەۋپسىزلىك كېڭىشىنىڭ «ئىراننى رايوننىڭ بىخەتەرلىكىنى ئاجىزلاشتۇرۇش بىلەن ئەيىبلىيەلمەيدىغانلىقىنى» ئېيتتى. بەقايرى: «خىتاي ۋە رۇسىيە، دېڭىزدا ۋە ئەركىن سودىغا قارىتا ئىشەنچسىزلىكنىڭ ئاساسلىق مەنبەسى ئامېرىكا ئىكەنلىكىنى بىلىدۇ. خەلقئارا جەمئىيەت مەسئۇلىيەتچان بىر قەدەم تاشلاشنى خالىسا، ئامېرىكانىڭ قىلمىشلىرىنى ئەيىبلىشى كېرەك» دېدى.
ئىشەنچنى ئاشۇرۇش تەدبىرلىرى
بۇ جەرياندا، مۇزاكىرىلەرگە يېقىن بىر مەنبە، ئىراننىڭ قايتا كۆزدىن كەچۈرۈلگەن 14 ماددىلىق بىر تېكىستنى پاكىستانلىق ۋاسىتچىلەرگە سۇنغانلىقىنى ۋە تېكىستنىڭ ئامېرىكا تەرەپكە يەتكۈزۈلۈشى كۈتۈلۈۋاتقانلىقىنى «تەسنىم خەۋەر ئاگېنتلىقى» غا ئاشكارىلىدى. مەنبە واشىنگتوننىڭ يېقىندا ئىراننىڭ ئىلگىرىكى 14 ماددىلىق تەكلىپىگە جاۋابەن بىر تېكىست ئەۋەتكەنلىكىنى، بۇ تېكىستنىڭمۇ پاكىستاننىڭ ۋاسىتچىلىقىدا يەتكۈزۈلگەنلىكىنى بىلدۈردى.
مەلۇماتقا قارىغاندا، ئىران ئىككى تەرەپ ئوتتۇرىسىدىكى ئۇچۇر ئالماشتۇرۇش ئۈچۈن قۇرۇلغان مېخانىزم بويىچە ئۆزگەرتىشلەرنى كىرگۈزگەندىن كېيىن، قايتا كۆزدىن كەچۈرۈلگەن تېكىستنى سۇنغان. يېڭى ئىران تېكىستىنىڭ «ئۇرۇشنى ئاخىرلاشتۇرۇشنى» مەقسەت قىلغان مۇزاكىرىلەرگە ۋە ئامېرىكا تەرەپتىن كۈتۈلۈۋاتقان «ئىشەنچنى ئاشۇرۇش تەدبىرلىرى» گە مەركەزلەشكەنلىكى قەيت قىلىندى.
ئامېرىكا ۋە ئىسرائىلىيەنىڭ فېۋرال ئېيىدا ئىرانغا ھۇجۇم قىلىشىدىن بۇيان رايوندا جىددىيلىك كۈچەيدى. تېھران ھۆكۈمىتى، ئىسرائىلىيەدىن باشقا يەنە قولتۇقتىكى ئامېرىكانىڭ ئىتتىپاقداشلىرىنى نىشانلىغان ھۇجۇملار بىلەن ۋە ھورمۇز بوغۇزىنى تاقاش بىلەن جاۋاب قايتۇردى. پاكىستاننىڭ ۋاسىتچىلىقىدا 8-ئاپرېلدا ئۇرۇش توختىتىش يولغا قويۇلغان بولسىمۇ، ئەمما ئىسلامئابادتىكى سۆھبەتلەردە دائىملىق بىر كېلىشىم ھاسىل قىلىنالمىدى. ئامېرىكا پېرىزىدېنتى دونالد ترامپ كېيىنچە ئۇرۇش توختىتىشنى مۇددەتسىز ئۇزارتتى.
