ئىسرائىلىيەلىك ئالدامچى سىمون لېۋىيېۋ تەرىپىدىن زىيانكەشلىككە ئۇچرىغان ئاياللار، ئۇنىڭ قولغا ئېلىنىشىنىڭ ئۆزلىرى ئۈچۈن بىر خاتىرجەملىك ۋە كەلگۈسىدىكى زىيانكەشلىككە ئۇچرىغۇچىلار ئۈچۈن قوغداش بىلەن تەمىنلەيدىغانلىقىنى بىلدۈردى.
Netflix نىڭ داڭلىق ھۆججەتلىك فىلىمى «Tinder Swindler» بىلەن تونۇلغان ئىسرائىلىيەلىك ئالدامچى سىمون لېۋىيېۋنىڭ زىيانكەشلىككە ئۇچرىغۇچىسى بولغان ئىككى ئايال، لېۋىيېۋنىڭ گرۇزىيەدە قولغا ئېلىنغانلىقىنى ئاڭلاپ خاتىرجەم بولغانلىقىنى بىلدۈردى.
ھەقىقىي ئىسمى شىمون يېھۇدا ھايۇت بولغان 34 ياشلىق لېۋىيېۋ، تاراتقۇلارنىڭ تەكشۈرۈشلىرى بىلەن ئاشكارىلانغان رومانتىك ئالدامچىلىق ۋە مالىيە جىنايەتلىرى سەۋەبىدىن نام چىقارغان.
گرۇزىيە دائىرىلىرى، لېۋىيېۋنىڭ دۈشەنبە كۈنى باتۇمى ئايرودرومىدا خەلقئارا جىنايى ئىشلار ساقچى تەشكىلاتى (Interpol) نىڭ تەلىپىگە ئاساسەن قولغا ئېلىنغانلىقىنى ئېلان قىلدى.
شىۋىتسىيەلىك زىيانكەشلىككە ئۇچرىغۇچى پېرنىللا سىيوھولم، ستوكھولمدا AFP خەۋەر ئاگېنتلىقىغا قىلغان سۆزىدە، «تۈنۈگۈن ئازراق تەبرىكلەش ئۆتكۈزدۈم. خۇشال ھېس قىلىشقا ھەققىم بار، چۈنكى بۇ ئادەم ھاياتىمنى ۋەيران قىلدى» دېدى.
نورۋېگىيەلىك زىيانكەشلىككە ئۇچرىغۇچى سېسېلىيە فيېللخوي بولسا، ئۇزۇن بىر كۈتۈشتىن كېيىن ئىشقا ئاشقان قولغا ئېلىنىشقا ھەيران قالغانلىقىنى بىلدۈردى. فيېللخوي، ئەھۋالنى «كىچىك بىر تەبرىكلەشكە ئوخشايتتى» دەپ تەرىپلەپ، جەرياننىڭ ئۇزۇن داۋام قىلىشىغا قارىماي ئۆزىنى «ناھايىتى خاتىرجەم» ھېس قىلغانلىقىنى ئېيتتى.
لېۋىيېۋنىڭ 2017-2019-يىللىرى ئارىسىدا Tinder ئىسىملىك تونۇشۇش ئەپىدە باي بىر مىراسخورغا ئوخشاش ياسىنىۋېلىپ ئاياللارنى ئالدىغانلىقى ۋە ھەرگىز قايتۇرمىغان چوڭ مىقداردا قەرز ئالغانلىقى ئىلگىرى سۈرۈلمەكتە.
لېۋىيېۋنىڭ پىلانى، زىيانكەشلىككە ئۇچرىغۇچىلارنى ماددىي ۋە ھېسسىياتلىق توزاقلارغا تارتىش ئۈچۈن ساختا تور كىملىكى قۇرۇش دېگەن مەنىدىكى «catfishing» نىڭ ئەڭ داڭلىق مىساللىرىدىن بىرىگە ئايلاندى.
فيېللخوي، لېۋىيېۋنىڭ قولغا ئېلىنىشىنىڭ «بىر خىل خاتىرجەملىك ئېلىپ كەلگەنلىكىنى» بىلدۈرۈپ، «چۈنكى ئەمدى قوغدىلىۋاتقانلىقىمنى بىلىمەن. كەلگۈسىدىكى زىيانكەشلىككە ئۇچرىغۇچىلارنىڭمۇ قوغدىلىۋاتقانلىقىنى بىلىمەن. ئەمما بۇنچە ئۇزۇن ۋاقىت كېتىشى ۋە بىز بىلگەن قەدەر بۇنچە كۆپ زىيانكەشلىككە ئۇچرىغۇچىنىڭ يىغىلىپ قېلىشى مېنى غەزەپلەندۈرىدۇ» دېدى.
2018-يىلى مارتتا Tinder' دا لېۋىيېۋ بىلەن تونۇشقان سىيوھولم، بىر نەچچە ئاي ئىچىدە ئالدامچىلىققا ئۇچرىغانلىقىنى ئېيتتى. جەمئىي 65 مىڭ دوللاردىن ئارتۇق پۇل بەرگەنلىكىنى ۋە بۇ پۇلنىڭ ھېچقاچان قايتۇرۇلمىغانلىقىنى تەكىتلىدى.
خەلقئارالىق قولغا ئېلىش بۇيرۇقىنى چىقارغان دۆلەتكە رەھمەت ئېيتىپ، «ئۇنىڭ قولغا ئېلىنىشى بىر غەلىبە» دېدى.
ھازىر 38 ياشتا بولغان سىيوھولم، ھاياتىنى قايتىدىن قۇرۇپ چىققانلىقىنى بىلدۈرۈپ، «2018- ۋە 2019-يىللىرىدا ۋەيران بولغان ئىدىم. بۈگۈن بۇ يەردە تۇرۇپ بۇنچە خۇشال بولۇش ئىشەنگۈسىز» دېدى ۋە ھازىرقى ئائىلە ھاياتىنى «ناھايىتى خۇشال» دەپ تەرىپلىدى.
سىيوھولم، شۇ ۋاقىتتىن بۇيان مالىيە ئالدامچىلىقى بىلەن كۈرەش قىلىش پائالىيەتلىرىگە قاتناشقانلىقىنى ۋە سۈنئىي ئىدراك ۋە deepfake تېخنىكىلىرى ئۈستىدە تېخىمۇ قاتتىق تەرتىپكە سېلىش چاقىرىقىدا بولغانلىقىنى بىلدۈردى. «بىز ئالدامچىلىقنى پەقەت بىر پۇل يوقىتىش دەپ قارىماسلىقىمىز كېرەك. بىز بۇنى زىيانكەشلىككە ئۇچرىغۇچىلارنىڭ باشتىن كەچۈرگەن ھېسسىيات خورلۇقى دەپمۇ كۆرۈشىمىز كېرەك» دېدى.
سىيوھولم يەنە، بىر دېلو ئېچىلغان تەقدىردە ئەيىبلەنگۈچىنىڭ زىيىنىغا گۇۋاھلىق بېرىشكە تەييار ئىكەنلىكىنى قوشۇمچە قىلدى.
