ئەنگلىيە ھۆكۈمىتىنىڭ 2025-يىلى سېنتەبىردە پەلەستىن دۆلىتىنى ئېتىراپ قىلىش قارارىدىن كېيىن، پەلەستىننىڭ لوندوندىكى ۋاكالەتخانىسى رەسمىي تۈردە ئەلچىخانا دەرىجىسىگە ئۆستۈرۈلدى. «پەلەستىن دۆلىتى ئەلچىخانىسى» دەپ ئاتىلىشقا باشلىغان مەزكۇر دىپلوماتىك ئورگان 5-يانۋاردىن باشلاپ رەسمىي پائالىيەت باشلىغان بولۇپ، بۇ ئەھۋال ئىككى دۆلەت ئوتتۇرىسىدا تولۇق دىپلوماتىك مۇناسىۋەت ئورنىتىش يولىدىكى تارىخىي قەدەم دەپ قارالماقتا. مەزكۇر ئۆزگىرىش ئاۋسترالىيە ۋە كانادا قاتارلىق دۆلەتلەرنىڭ پەلەستىننى ئېتىراپ قىلىش ھەرىكىتىدىن كېيىن ئوتتۇرىغا چىقتى.
پەلەستىننىڭ ئەنگلىيەدە تۇرۇشلۇق ئەلچىسى ھۇسام زوملوت ئىجتىمائىي تاراتقۇ سۇپىسى «X» تىكى باياناتىدا، ۋاكالەتخانىنىڭ ئەلچىخانا دەرىجىسىگە كۆتۈرۈلۈشىنى ئەنگلىيە-پەلەستىن ئالاقىلىرىدىكى بىر بۇرۇلۇش نۇقتىسى دەپ ئاتىدى. ئۇ يەنە بۇ تارىخىي مۇۋەپپەقىيەتنىڭ پەلەستىن خەلقىنىڭ ئەركىنلىك ۋە ئۆز تەقدىرىنى ئۆزى بەلگىلەش يولىدىكى ئۇزۇن مەزگىللىك كۈرەش مۇساپىسىدىكى بىر ئۇل تاش بولۇپ قالىدىغانلىقىنى تەكىتلىدى.
زوملوت سۆزىدە يەنە: «ئەنگلىيە خەلقىنىڭ بىز بىلەن بىر سەپتە تۇرۇپ كۆرسەتكەن ھەمكارلىقى بىزنىڭ بۈگۈنكىدەك نەتىجىگە ئېرىشىشىمىزگە تۈرتكە بولدى. بۇ خىل قوللاش كەلگۈسىدىكى مۈشكۈل مۇساپىلىرىمىزدە يەنىلا ھەل قىلغۇچ رول ئوينايدۇ» دېگەنلەرنى سۆزلىرىگە ئىلاۋە قىلدى.
ئەنگلىيەنىڭ يېقىن شەرق ئىشلىرى ۋەزىرى ھامىش فالكونېر بۇ ھەقتە توختىلىپ، مەزكۇر قارارنىڭ «ئىككى دۆلەتلىك ھەل قىلىش چارىسىنى ساقلاپ قېلىش ھەمدە ئىسرائىلىيە بىلەن پەلەستىن خەلقلىرى ئارىسىدا ئۈزۈل-كېسىل تىنچلىق ئورنىتىش» مەقسىتىدە چىقىرىلغانلىقىنى بىلدۈرگەن ئىدى.
فالكونېر لوندوندىكى پەلەستىن ئەلچىخانىسىنىڭ رەسمىي ئېچىلغانلىقىنى مۇئەييەنلەشتۈرۈش بىلەن بىرگە، ئىككى تەرەپ دىپلوماتىك ئالاقىلىرىنىڭ رەسمىيلەشكەنلىكىنى قارشى ئالىدىغانلىقىنى ئېيتتى. ئۇ يەنە غەززەدىكى ئېغىر ئىنسانپەرۋەرلىك كىرىزىسنى تىلغا ئېلىپ، ياردەم بۇيۇملىرىنى يەتكۈزۈشتە سىرتتىن قارىغاندا ئازراق ئىلگىرىلەشلەر بولغان بولسىمۇ، لېكىن ئەھۋالنىڭ يەنىلا جىددىي ئىكەنلىكىنى ئەسكەرتتى.
ۋەزىر فالكونېر سۆزىنى داۋاملاشتۇرۇپ: «تېخىمۇ كۆپ ياردەم ئاپتوموبىللىرىنىڭ غەززەگە كىرىۋاتقانلىقى كىشىنى سۆيۈندۈرىدۇ، بىراق ئاساسلىق ئۆتكەللەر يەنىلا يېپىق تۇرۇۋاتىدۇ. ياردەم ئەترەتلىرى قايتۇرۇۋېتىلىۋاتىدۇ، داۋالاش ۋە پاناھلىنىش بويۇملىرىنىڭ كىرىشىگە توسقۇنلۇق قىلىنىۋاتىدۇ، شۇنداقلا ھۆكۈمەتسىز تەشكىلاتلارنىڭ پائالىيەتلىرى چەكلىنىۋاتىدۇ»، دېدى.
بۇ ئەلچىخانىنىڭ دەرىجىسىنى ئۆستۈرۈش ئەنگلىيەنىڭ پەلەستىن دائىرىلىرى بىلەن بولغان مۇناسىۋىتىنى يېڭى بىر بالداققا كۆتۈرۈش تىرىشچانلىقىنى كۆرسىتىپ بەرسىمۇ، غەززەدىكى ئىنسانپەرۋەرلىك ئېھتىياجلارنى قامداشتا مەۋجۇت بولۇۋاتقان زور قىيىنچىلىقلارنىڭ يەنىلا داۋاملىشىۋاتقانلىقىنى ئەسكەرتمەكتە.
