ئامېرىكا تاشقى ئىشلار مىنىستىرى ماركو رۇبىيو، ئامېرىكا پىرېزىدېنتى دونالد ترامپنىڭ ئىيۇل ئېيىدا ئەنقەرەدە ئۆتكۈزۈلىدىغان ناتو دۆلەت ۋە ھۆكۈمەت باشلىقلىرى يىغىنىغا قاتنىشىدىغانلىقىنى جاكارلىدى.
ئاۋام پالاتاسى تاشقى مۇناسىۋەتلەر كومىتېتىدا سۆز قىلغان رۇبىيو، ئەنقەرەدە چاقىرىلىدىغان ناتو باشلىقلار يىغىنىنىڭ ئىتتىپاق تارىخىدىكى «ئەڭ مۇھىم يىغىن» بولىدىغانلىقىنى تەكىتلەپ مۇنداق دېدى:
«بۇ يەردە ئايدىڭلاشتۇرۇشقا ۋە تۈزىتىشكە تېگىشلىك بەزى مەسىلىلەر بار. ئامېرىكا قوشما ئىشتاتلىرى يەنىلا ناتو ئىتتىپاقىنىڭ بىر ئەزاسىدۇر ۋە بىز ئۇ يەردە بولىمىز.»
رۇبىيو شىمالىي ئاتلانتىك ئەھدى تەشكىلاتى ئىچىدە «مۇھىم ئۆزگىرىشلەر» گە ئېھتىياج بارلىقىنى ۋە بۇ مەسىلىلەرنىڭ 7-8-ئىيۇل كۈنلىرى تۈركىيەنىڭ پايتەختىدە ئۆتكۈزۈلىدىغان باشلىقلار يىغىنىدا مۇزاكىرە قىلىنىدىغانلىقىنى قەيت قىلدى.
مىنىستىر فىدانمۇ ترامپنىڭ قاتنىشىدىغانلىقىدىن بېشارەت بەرگەن ئىدى
تاشقى ئىشلار مىنىستىرى خاقان فىدانمۇ ترامپنىڭ ناتو باشلىقلار يىغىنىغا قاتنىشىشنى پىلانلاۋاتقانلىقىغا ئىشارەت قىلغان ئىدى. جۇمھۇر رەئىس رەجەپ تاييىپ ئەردوغاننىڭ ئالدىنقى ئايدا ترامپ بىلەن بىرنەچچە قېتىم تېلېفوندا سۆھبەت ئۆتكۈزگەنلىكىنى ئەسكەرتكەن فىدان، ئامېرىكا پىرېزىدېنتىنىڭ ھەربىر سۆھبەتتە باشلىقلار يىغىنىغا قاتنىشىش نىيىتىنىڭ بارلىقىنى بايان قىلغانلىقىنى ئەسكەرتكەن ئىدى.
سىياسىي باياناتلارغا قارىماي ئامېرىكانىڭ شىمالىي ئاتلانتىك ئەھدى تەشكىلاتىغا بولغان ساداقىتىنىڭ داۋاملىشىۋاتقانلىقىنى تەكىتلىگەن مىنىستىر فىدان، ۋاشىنگتوننىڭ ناتودىن چېكىنىپ چىقىشى مۇمكىنلىكىگە دائىر ئاگاھلاندۇرۇشلار توغرىسىدا ئېنىق بىر ئىسپات يوقلۇقىنى ئەسكەرتىپ مۇنداق دېدى:
«ئامېرىكا ئىتتىپاقداشلىرىغا مۇداپىئە چىقىملىرىنى ئاشۇرۇش ۋە ئۆز بىخەتەرلىكى ئۈچۈن تېخىمۇ كۆپ مەسئۇلىيەتنى زىممىسىگە ئېلىش توغرىسىدا ئۈزلۈكسىز بېسىم قىلىۋاتىدۇ. ياۋروپالىقلار بۇ سىگنالنى قوبۇل قىلدى ۋە ناتو دائىرىسىدە مۇداپىئە خامچوتىنى ئاشۇرۇش ئۈچۈن قەدەملەرنى تاشلىدى. رەھبەرلەر بىر يەرگە جەم بولغاندا قولغا كەلتۈرۈلگەن ئىلگىرىلەشلەرنى كۆزدىن كەچۈرىمىز.»
