شىركەت تەرىپىدىن ئېلان قىلىنغان باياناتقا قارىغاندا، رېئالتا (Realta) مەسلىھەتچىلىك شىركىتى تەرىپىدىن بۇ يىل 17-قېتىم ئېلىپ بېرىلغان تەتقىقاتقا 98 مىڭدىن ئارتۇق ئۇنىۋېرسىتېت ئوقۇغۇچىسى ۋە تەخمىنەن 40 مىڭ ياش كەسپىي خادىم بولۇپ، جەمئىي 137 مىڭدىن ئارتۇق كىشى قاتناشقان.

قاتناشقۇچىلار شىركەتلەرگە رەھبەرلىك چۈشەنچىسى، كەسپىي تەرەققىيات پۇرسەتلىرى، تەربىيەلەش ۋە يېتىشتۈرۈش ئىمكانىيەتلىرى، ئورگان مەدەنىيىتى، مائاش ۋە قوشۇمچە مەنپەئەتلەر ھەمدە خىزمەت مۇھىتى قاتارلىق ئۆلچەملەر بويىچە باھا بەرگەن.

تەتقىقات نەتىجىسىگە ئاساسلانغاندا، تۈركىيە ئاۋىياتسىيە ۋە ئالەم بوشلۇقى سانائىتى شىركىتى تۇنجى قېتىم دۆلەت مۇداپىئە سانائىتى ساھەسىنىڭ ئالدىنقى قاتارىدىن ئورۇن ئالغان. شۇنىڭ بىلەن مەزكۇر شىركەت ياش ئىختىساسلىقلارنىڭ كەسپىي نىشانلىرىدا ئەڭ كۆپ تاللايدىغان ساھە ئورگىنى بولۇپ قالغان.

تۈركىيە ئاۋىياتسىيە ۋە ئالەم بوشلۇقى سانائىتى شىركىتى بارلىق ساھەلەرنى ئۆز ئىچىگە ئالغان «تۈركىيەنىڭ ئەڭ ئالقىشلانغان 200 شىركىتى» تىزىملىكىدىمۇ ئالدىنقى يىلغا سېلىشتۇرغاندا 12 بالداق يۇقىرى كۆتۈرۈلۈپ، 6-رەتكە تىزىلغان.

مىللىي ئاۋىياتسىيە، ئالەم بوشلۇقى ۋە دۆلەت مۇداپىئە تېخنولوگىيەلىرىدە ئېلىپ بېرىۋاتقان تۈرلىرى بىلەن دىققەت قوزغاپ كېلىۋاتقان تۈركىيە ئاۋىياتسىيە ۋە ئالەم بوشلۇقى سانائىتى شىركىتى  ئۆزىگە خاس سۇپىلىرى ۋە يۇقىرى تېخنولوگىيەگە يۈزلەنگەن خىزمەت مۇھىتى بىلەن ياش ئىنژېنېرلار ۋە كەسپىي خادىملار ئۈچۈن مۇھىم كەسپىي مەركەزلەرنىڭ بىرى بولۇشنى داۋاملاشتۇرماقتا.