ئىران تاشقى ئىشلار مىنىستىرى ئابباس ئاراقچى بىلەن قاتار تاشقى ئىشلار مىنىستىرى مۇھەممەد بىن ئابدۇرراھمان ئالسانى تېھراندا بىر يەرگە جەم بولۇپ، رايونلۇق ئۆزگىرىشلەرنى مۇزاكىرە قىلدى.

ئىران رەسمىي خەۋەر ئاگېنتلىقى IRNA نىڭ خەۋىرىگە قارىغاندا، پايتەخت تېھراننى زىيارەت قىلىۋاتقان قاتار تاشقى ئىشلار مىنىستىرى ئالسانى، تاشقى ئىشلار مىنىستىرلىقىدا كەسپىيىدىشى ئابباس ئاراقچى تەرىپىدىن قارشى ئېلىندى. قارشى ئېلىش مۇراسىمىدىن كېيىن، ئاراقچى بىلەن ئالسانى ئۆزئارا سۆھبەت ئۆتكۈزدى.

 قاتار تاشقى ئىشلار مىنىستىرلىقىنىڭ باياناتچىسى ماجىد ئەلئەنسارى، تاشقى ئىشلار مىنىستىرى ئالسانىنىڭ 27-ئاۋغۇستتىكى تېھران زىيارىتى جەريانىدا، رايوندىكى جىددىيچىلىكنى تۆۋەنلىتىش ۋە ئامېرىكا بىلەن ئىران ئوتتۇرىسىدا دىيالوگ ئورنىتىشقا مۇۋاپىق شارائىت يارىتىش مەسىلىلىرىنى مۇزاكىرە قىلىدىغانلىقىنى بىلدۈرگەن ئىدى.

ئىران تاشقى ئىشلار مىنىستىرلىقىنىڭ باياناتچىسى ئىسمائىل بەقائىمۇ مەزكۇر زىيارەتنىڭ ئىران بىلەن قاتار ئوتتۇرىسىدىكى مۇناسىۋەتلەرنى تەرەققىي قىلدۇرۇش ۋە رايونلۇق تىنچلىق ھەم خەۋپسىزلىكنى كۈچەيتىش مەقسىتىدىكى مەسلىھەتلىشىشلەر دائىرىسىدە ئېلىپ بېرىلىدىغانلىقىنى ئەسكەرتتى.

يەنە بىر تەرەپتىن، ئامېرىكا بىلەن ئىران ئوتتۇرىسىدا 17-ئىيۇن كۈنى ئىمزالانغان، ئەمما يولغا قويۇلمىغان كېلىشىم لايىھەسىنىڭ مۇرەسسەچىسى بولغان پاكىستاننىڭ باش ئىشتاب باشلىقى گېنېرال ئاسىم مۇنىر، 24-ئاۋغۇست كۈنى تېھراننى زىيارەت قىلىپ، پىرېزىدېنت مەسئۇد پەزەشكىيان، پارلامېنت رەئىسى مۇھەممەد باقىر كالىباف ۋە دۆلەت خەۋپسىزلىك ئالىي كېڭىشىنىڭ باش كاتىپى مۇھسىن رىزائى قاتارلىقلار بىلەن كۆرۈشكەن ئىدى. ئىران ۋە پاكىستان دائىرىلىرى بۇ سۆھبەتلەرنىڭ ناھايىتى ئۈنۈملۈك بولغانلىقىنى بايان قىلغان ئىدى.

ئامېرىكا بىلەن ئىران ئوتتۇرىسىدا 28-فېۋرالدىن بۇيان داۋاملىشىۋاتقان ئۇرۇش ئالدىدىكى سۆھبەتلەرنىڭ مۇرەسسەچىسى ۋە ئىران بىلەن ھورمۇز بوغۇزى مەسىلىسىدە سۆھبەت ئۆتكۈزگەن ئوماننىڭ تاشقى ئىشلار ۋەزىرى بەدر بىن ھەمەد ئەلبۇسەئىدىمۇ 25-ئاۋغۇست كۈنى تېھراننى زىيارەت قىلىپ، كەسپىيىدىشى ئابباس ئاراقچى بىلەن سۆھبەت ئۆتكۈزگەن ئىدى.