سۈرىيە دائىرىلىرى تېررورلۇق تەشكىلاتى ي پ گ نىڭ يېتەكچىلىكىدىكى «سۈرىيە دېموكراتىك كۈچلىرى» (SDG) نىڭ ھۇجۇملىرىدىن كېيىن، ھەلەب خەلقئارا ئايرودرومىغا كېلىدىغان ۋە ئۇ يەردىن ئايرىلىدىغان ئۇچۇشلارنىڭ ۋاقىتلىق توختىتىلغانلىقىنى ئېلان قىلدى.
ئاممىۋى ھاۋا قاتنىشى باش ئىدارىسى يولۇچىلارنىڭ، ئۇچۇش گۇرۇپپىلىرىنىڭ ۋە ئايرودروم مەشغۇلاتلىرىنىڭ بىخەتەرلىكىگە كاپالەتلىك قىلىش مەقسىتىدە، ئۇچۇشلارنىڭ 24 سائەتلىك جىددىي توختىتىلغانلىقىنى بىلدۈردى.
توختىتىپ تۇرۇش مۇددىتى ئىچىدە بارلىق قەرەللىك ئۇچۇشلارنىڭ، مۇناسىۋەتلىك دائىرىلەر بىلەن ماسلاشقان ھالدا تېخنىكىلىق ۋە بىخەتەرلىك باھالاشلىرى تاماملانغۇچە دەمەشىق خەلقئارا ئايرودرومىغا يۆتكىلىدىغانلىقى ئەسكەرتىلدى.
ھاۋا قاتنىشى ئىدارىسى بۇ قارارنى «ئالدىنى ئېلىش مەقسىتىدىكى ۋاقىتلىق تەدبىر» دەپ سۈپەتلىدى ھەمدە توختىتىش مۇددىتى ئاخىرلاشقاندا ياكى يېڭى ئۆزگىرىشلەر بولغاندا ئەھۋالنىڭ يېڭىلىنىدىغانلىقىنى ئېيتتى. يولۇچىلارغا ئەڭ يېڭى ئۇچۇش ئۇچۇرلىرى ئۈچۈن ئاۋىياتسىيە شىركەتلىرى بىلەن ئالاقىلىشىش تەۋسىيە قىلىندى.
بۇ توختىتىش قارارى سۈرىيە دائىرىلىرى تەرىپىدىن تېررورلۇق تەشكىلاتى ي پ گ نىڭ يېتەكچىلىكىدىكى SDG نىڭ ئېلىپ بارغانلىقى ئىلگىرى سۈرۈلگەن ۋە سەيشەنبە كۈنى ئەتىگەن تەرەپتە ھەلەبتە يۈز بەرگەن ھۇجۇملاردىن كېيىن چىقىرىلغان ئىدى.
رەسمىي باياناتلارغا قارىغاندا، سۈرىيەدە بىر ئەسكەر ۋە بىر كىچىك بالىنى قوشقاندا، جەمئىي تۆت پۇقرا قازا قىلغان ۋە نۇرغۇن كىشى يارىلانغان ئىدى.
سۈرىيە ۋە تۈركىيە تەرىپىدىن «پ ك ك تېررورلۇق تەشكىلاتىنىڭ سۈرىيەدىكى گۇماشتىسى دەپ بېكىتكەن ي پ گ تەشكىلاتى «سۈرىيە دېموكراتىك كۈچلىرى» (SDG) نىڭ كونتروللۇقىدا تۇرماقتا.
