ئامېرىكا گېئولوگىيەلىك تەكشۈرۈش ئىدارىسى (USGS) رۇسىيەنىڭ يىراق شەرق قىسمىدىكى كامچاتكا دېڭىز تەۋەلىكىدە 7.4 بال يەر تەۋرىگەنلىكىنى ئېلان قىلدى.

قەيت قىلىنىشىچە، شەنبە كۈنى يۈز بەرگەن يەر تەۋرەش رۇسىيەنىڭ كامچاتكا رايونىنىڭ مەمۇرىي مەركىزى پېتروپاۋلوۋسك-كامچاتسكىي شەھىرىنىڭ شەرقىگە 111 كىلومېتىر كېلىدىغان جايدا، 39.5 كىلومېتىر چوڭقۇرلۇقتا يۈز بەرگەن.

تىنچ ئوكيان دېڭىز تاشقىنى ئاگاھلاندۇرۇش مەركىزى يەر تەۋرەش مەركىزىگە 300 كىلومېتىر كېلىدىغان رۇسىيە دېڭىز قىرغاقلىرىدا «خەتەرلىك» دولقۇنلارنىڭ پەيدا بولۇشى مۇمكىنلىكىنى بىلدۈردى.

ئامېرىكا گېئولوگىيەلىك تەكشۈرۈش ئىدارىسى دەسلەپتە تەۋرەشنىڭ 7.5 بال ئىكەنلىكىنى بىلدۈرگەن، كېيىن 7.4 بالغا تۆۋەنلەتكەن.

كامچاتكا يېرىم ئارىلى دېڭىز تەۋەلىكىدە ئىيۇل ئېيى (2025) دا  خاتىرىلەنگەن تارىختىن بۇيانقى ئەڭ چوڭ يەر تەۋرەشلەرنىڭ بىرى يۈز بېرىپ،  تۆت مېتىر (12 فۇت) ئېگىزلىكتىكى دېڭىز دولقۇنى پەيدا بولغان ھەمدە ھاۋايدىن ياپونىيەگىچە بولغان جايلاردا كىشىلەرنى تارقاقلاشتۇرۇشقا سەۋەب بولغان ئىدى.  شۇ قېتىمقى 8.8 بال يەر تەۋرەش، 2011-يىلى ياپونىيە دېڭىز تەۋەلىكىدە يۈز بەرگەن ۋە 15 مىڭ كىشى جېنىدىن ئايرىلغان 9.1 بال يەر تەۋرەشتىن كېيىنكى بىر قېتىملىق ئەڭ چوڭ يەر تەۋرەش دەپ خاتىرىلەنگەن ئىدى.

ئىيۇل ئېيىدىكى يەر تەۋرەش ياپونىيە ھۆكۈمىتىنى ئىككى مىليونغا يېقىن كىشىنى ئېگىز جايلار تارقاقلاشتۇرۇشقا سەۋەب بولغان ئىدى. رايوندا دېڭىز تاشقىنى ئاگاھلاندۇرۇشلىرى ئېلان قىلىنىپ ئۇزۇن ئۆتمەي بىكار قىلىنغان ياكى سەۋىيەسى تۆۋەنلىتىلگەن ئىدى.