تۈركىيە جۇمھۇرىيىتى جۇمھۇر رەئىسى رەجەپ تاييىپ ئەردوغان: «خەلقئارا سوتنىڭ قارارلىرىغا قارىماي سرېبرېنىتسا ئىرقىي قىرغىنچىلىقىنى ئىنكار قىلىدىغان ۋە ‹ئۇرۇش جىنايەتچىلىرىنى ئۇلۇغلايدىغان› ھەر تۈرلۈك سۆز ۋە باياناتلارنى رەت قىلىمىز» دېدى.

رەجەپ تاييىپ ئەردوغاننىڭ بۇ سۆزلىرى، 1995-يىلى مىڭلىغان بوسنىيە - گېرتسېگوۋىنالىقلار ھاياتىدىن ئايرىلغان سرېبرېنىتسا ئىرقىي قىرغىنچىلىقىنىڭ 30 - يىللىق خاتىرە كۈنى مۇناسىۋىتى بىلەن ئېلان قىلىنغان بىر ۋىدېيودىن ئورۇن ئالدى.

ئەردوغان يەنە، ئەنقەرەنىڭ بوسنىيە - گېرتسېگوۋىنانىڭ زېمىن پۈتۈنلۈكى، ئىگىلىك ھوقۇقى ۋە ئاساسىي قانۇن تۈزۈمىنى شەرتسىز قوللاپ كېلىۋاتقانلىقىنى، بۇنىڭدىن كېيىنمۇ شۇنداق قىلىدىغانلىقىنى تەكرارلىدى.

ئىسرائىلىيەنىڭ غەززەگە قىلىۋاتقان ھۇجۇملىرى توغرىلىقمۇ توختالغان ئەردوغان، ئۇزۇن يىللار ئىلگىرى خەلقئارا جەمئىيەتنىڭ سرېبرېنىتسا ئىرقىي قىرغىنچىلىقى ئالدىدا سۈكۈت قىلغانلىقىنى ۋە يېقىنقى يىللاردا پەلەستىندە يۈز بەرگەن زۇلۇملارنىمۇ پەقەتلا كۆرۈپ تۇرغانلىقىنى بىلدۈردى.

ئەردوغان ئىسرائىلىيە ھۆكۈمىتىنىڭ تەخمىنەن 58 مىڭ پەلەستىنلىككە قاراتقان ئىرقىي قىرغىنچىلىقى سەۋەبىدىن «ھامان بىر كۈنى» قانۇن ۋە تارىخ ئالدىدا چوقۇم جاۋابكارلىققا تارتىلىدىغانلىقىنى تەكىتلىدى.