نىگېرىيە ئارمىيەسى دۆلەتنىڭ شىمالىي شەرقىدە ئېلىپ بېرىلغان بىر ھەرىكەتتە، بوكو ھارامنىڭ ئاتالمىش قوماندانى بىلەن تەشكىلاتنىڭ 10 ئەزاسىنىڭ ئۆلتۈرۈلگەنلىكىنى ئېلان قىلدى.
ئارمىيە ئېلان قىلغان باياناتىدا، ھەرىكەتنىڭ يەكشەنبە كۈنى بورنو ئىشتاتىدىكى سامبىسا ئورمانلىقىدا ئېلىپ بېرىلغانلىقىنى، ئۆلتۈرۈلگەن ئاتالمىش رەھبەرنىڭ «بوكو ھارامنىڭ ئىككىنچى قوماندانى» بولغان ئەبۇ خالىد ئىكەنلىكىنى قەيت قىلدى.
ئەبۇ خالىدنىڭ قانۇنسىز تەشكىلات ئىچىدە ئاچقۇچلۇق رول ئوينىغانلىقى، سامبىسا لىنىيەسى بويىچە ئەشيا ئوبوروتى پائالىيەتلىرىنى ۋە تېررورلۇق ھەرىكەتلىرىنى ماسلاشتۇرغانلىقى بىلدۈرۈلدى.
باياناتتا نىگېرىيە ئەسكەرلىرى ئارىسىدا ئادەم ئۆلۈش ۋەقەسى يوقلۇقى، شىمالىي شەرقتىكى ئورمانلىق رايونلىرىدا تېررورلۇققا قارشى تۇرۇش ھەرىكەتلىرىنىڭ داۋاملىشىۋاتقانلىقى تەكىتلەندى.
2000-يىللارنىڭ باشلىرىدىن بۇيان نىگېرىيەدە پائالىيەت قىلىۋاتقان بوكو ھارامنىڭ 2009-يىلىدىن بېرى ئېلىپ بارغان ھۇجۇملىرىدا ئون مىڭلىغان كىشى ھاياتىدىن ئايرىلدى.
كىشىلىك ھوقۇق مۇتەخەسسىسلىرى بوكو ھارام ھۇجۇملىرىدا ھاياتىدىن ئايرىلغانلارنىڭ كۆپىنچىسىنىڭ مۇسۇلمانلار ئىكەنلىكىنى ئوتتۇرىغا قويماقتا.
دائىرىلەرنىڭ ئېيتىشىچە، بۇ تەشكىلات 2015-يىلىدىن بۇيان قوشنا دۆلەتلەر بولغان كامېرون، چاد ۋە نىگېردا ھۇجۇملارنى ئېلىپ بارغان. چاد كۆلى ئويمانلىقى مىقياسىدا ئاز دېگەندە 2000 كىشى بۇ ھۇجۇملاردا قازا قىلغان.
رايوندىكى تېررورلۇق ھۇجۇملىرى ۋە داۋاملىشىۋاتقان توقۇنۇشلار سەۋەبىدىن يۈز مىڭلىغان كىشى يۇرت-ماكانلىرىدىن ئايرىلىپ قالدى.
