سۈرىيە تاشقى ئىشلار مىنىستىرى ئەسەد ھەسەن شەيبانى ئىسلامئابادتا پاكىستانلىق كەسپىدىشى ئىسھاق دار بىلەن بىر يەرگە جەم بولۇپ، ئىككى دۆلەت ھەمكارلىقى ۋە رايونلۇق ئۆزگىرىشلەرنى مۇزاكىرە قىلدى. بۇ زىيارەت 2024-يىلى دېكابىردا بەششار ئەسەد ھاكىمىيىتى ئاغدۇرۇلغاندىن بۇيانقى تۇنجى قېتىملىق زىيارەت ھېسابلىنىدۇ.
پاكىستان تاشقى ئىشلار مىنىستىرلىقى ئاممىۋى ئورتاقلىشىش تور بېتى X سەھىپىسىدە ئېلان قىلغان باياناتىدا، ئىككى تەرەپنىڭ «مۇۋەپپەقىيەتلىك ۋە ئىجادىي» بىر يىغىن ئۆتكۈزگەنلىكىنى، يىغىندا پاكىستان بىلەن سۈرىيە ئوتتۇرىسىدىكى يىلتىزى چوڭقۇر قېرىنداشلىق رىشتىنى يەنە بىر قېتىم جەزملەشتۈرگەنلىكىنى بىلدۈردى. تەرەپلەر ئۆزئارا مەنپەئەت يەتكۈزىدىغان ساھەلەردە ھەمكارلىقنى تەرەققىي قىلدۇرۇش ۋە رايون خاراكتېرلىك مەسىلىلەر ئۈستىدە ئۆزئارا پىكىر ئالماشتۇردى.
مىنىستىر شەيبانىنىڭ زىيارەت جەريانىدا يەنە پاكىستان باش مىنىستىرى شاھباز شېرىف ۋە باشقا يۇقىرى دەرىجىلىك ھۆكۈمەت ئەمەلدارلىرى بىلەن كۆرۈشۈشى كۈتۈلمەكتە. سۈرىيە تاشقى ئىشلار مىنىستىرى دەرىجىسىدىكى ئەڭ ئاخىرقى زىيارەت 2007-يىلى ۋەلىد ئەلمۇئەللىم تەرىپىدىن ئېلىپ بېرىلغان ئىدى.
پاكىستان بىلەن سۈرىيە ئونلىغان يىللاردىن بۇيان ھەربىي ھەمكارلىق ۋە تەربىيەلەش پىروگراممىلىرى ئارقىلىق قويۇق مۇناسىۋىتىنى ساقلاپ كەلمەكتە. بەششار ئەسەد ھاكىمىيىتى ئاغدۇرۇلغاندىن كېيىنمۇ پاكىستاننىڭ دەمەشقتە تۇرۇشلۇق ئەلچىخانىسى ئوچۇق قالغان بولسىمۇ، ئەمما ئىككى دۆلەت ئوتتۇرىسىدىكى ھەمكارلىق ئۆتكەن ئىككى يىلدا چەكلىك سەۋىيەدە داۋاملاشقان ئىدى. ئىككى دۆلەت ئوتتۇرىسىدىكى رەسمىي دىپلوماتىك مۇناسىۋەت 1949-يىلى دېكابىردا باشلانغان.
