ئاسىيا تەرەققىيات بانكىسىنىڭ سەمەرقەنتتىكى يىپەك يولى كۆرگەزمە ۋە قۇرۇلتاي مەركىزىدە ئۆتكۈزۈلۈۋاتقان 59-نۆۋەتلىك يىللىق مۇدىرىيەت كېڭىشى يىغىنى «تەرەققىياتنىڭ بۇرۇلۇش نۇقتىسى: رايوننىڭ ئۆزئارا تۇتاشتۇرۇلغان كەلگۈسىنى شەكىللەندۈرۈش» تېمىسىدا داۋاملاشماقتا.

يىغىننىڭ ئىككىنچى كۈنىدىكى ئېچىلىش نۇتقىدا مىرزىيايېۋ ئۆزبېكىستاننىڭ نەچچە مىڭ يىللىق تارىخقا ئىگە ئىكەنلىكىنى ۋە ئۇلۇغ يىپەك يولىنىڭ تۈگۈنىگە جايلاشقانلىقىنى تەكىتلەپ، دۆلىتىنىڭ شەرق بىلەن غەربنى، شىمال بىلەن جەنۇبنى تۇتاشتۇرىدىغان مۇھىم مەركەز ئىكەنلىكىنى تىلغا ئالدى.

ئۆزبېكىستان ئىقتىسادىنىڭ يېڭى بىر تەرەققىيات باسقۇچىغا قەدەم قويغانلىقىنى تىلغا ئالغان مىرزىيايېۋ، يېقىنقى يىللاردا دۆلەتكە 150 مىليارد دوللارلىق چەت ئەل مەبلىغى جەلپ قىلىنغانلىقىنى ۋە مىڭلىغان زامانىۋى كارخانىلارنىڭ قۇرۇلغانلىقىنى قەيت قىلدى. ئۇ يەنە، يەر شارى خاراكتېرلىك مۇقىمسىزلىقلارغا قارىماي، ئۆزبېكىستان ئىقتىسادىنىڭ بۇ يىلنىڭ بىرىنچى پەسلىدە %8.7 ئاشقانلىقىنى تەكىتلىدى.

ئاسىيا تەرەققىيات بانكىسى بىلەن بولغان ھەمكارلىق دائىرىسىدە تەخمىنەن 16 مىليارد دوللار قىممىتىدىكى تۈرلەرنىڭ يولغا قويۇلۇۋاتقانلىقىنى بىلدۈرگەن مىرزىيايېۋ: «نامراتلىقنى ئازايتىش، ئىنسانىي كاپىتالنى تەرەققىي قىلدۇرۇش ۋە زامانىۋى ئۇل ئەسلىھە قۇرۇلۇشى قاتارلىق ساھەلەردە يېقىن ھەمكارلىقىمىزنى تېخىمۇ كېڭەيتىمىز. تۈنۈگۈن بانكا بىلەن 12 مىليارد دوللارلىق يېڭى بىر ھەمكارلىق پىلانىنى ئىمزالىدۇق» دېگەنلەرنى سۆزلىرىگە ئىلاۋە قىلدى.

ئۇ يەنە تاشكەنت ۋە سەمەرقەنتتە «كەلگۈسى مېتاللار» (Future Metals) تېخنىكا باغچىسى قۇرۇلۇۋاتقانلىقىنى، ئامېرىكا، خىتاي ۋە تۈركىيەنىڭ ئالدىنقى قاتاردىكى شىركەتلىرى بىلەن بىرلىكتە 1.6 مىليارد دوللار قىممىتىدىكى 70 تىن ئارتۇق تۈرنىڭ ئەمەلىيلىشىۋاتقانلىقىنى ئەسكەرتتى.