ئامېرىكا پىرېزىدېنتى دونالد ترامپ شەنبە كۈنى دۇبلىنغا قىلغان ئىككى كۈنلۈك زىيارىتى جەريانىدا بىرلەشكەن بىر ئىرېلاندىيە كۆرۈشنى «بەكمۇ خالايدىغانلىقىنى» ئېيتتى.
ئىرېلاندىيە باش مىنىستىرى مىشېل مارتىن بىلەن كۆرۈشكەندىن كېيىن مۇخبىرلارغا سۆز قىلغان ترامپ: «ئاخىرى بېرىپ چوقۇم ئىشقا ئاشىدۇ» دېدى ۋە بۇنىڭ «ئاجايىپ قالتىس ئىش» بولىدىغانلىقىنى بىلدۈردى.
مارتىن بىلەن كۆرۈشۈشتىن بۇرۇن ئىرېلاندىيە پىرېزىدېنتى كاتېرىن كوننوللىنى زىيارەت قىلغان ترامپ، دۇبلىندىكى رەسمىي پىرېزىدېنتلىق مەھكىمىسىدە ئۇچرىشىشلاردا بولدى.
قارشى ئېلىش مۇراسىمىدا ھەربىي ئوركېستىر تەرىپىدىن كۈتۈۋېلىنغان ترامپ بىلەن كوننوللى قول ئېلىشىپ كۆرۈشكەندىن كېيىن، سەمىمىي سۆھبەتلەشتى.
ئۇچرىشىشتىن كېيىن ئاپتوموبىلىغا قاراپ ماڭغان ترامپقا مۇخبىرلار تۈرلۈك سوئاللارنى سورىدى.
ترامپ ئامېرىكانىڭ ئىرانغا قارشى ئېلىپ بېرىۋاتقان ئۇرۇشىغا ئالاقىدار سوئالغا: «ھەممە ئىش ئۆز ئىزىغا چۈشىدۇ» دەپ جاۋاب بەردى.
ترامپ كېيىنچە «Farmleigh House» قا بېرىپ ئۆزىنى كۈتۈۋاتقان باش مىنىستىر مارتىن بىلەن ئۆزئارا ئۇچرىشىش ئۆتكۈزدى.
ئۇچرىشىشتا ئامېرىكا بىلەن ئىرېلاندىيەگە ئالاقىدار تۈرلۈك مەسىلىلەرنىڭ مۇزاكىرە قىلىنىشى مۆلچەرلەنمەكتە ئىدى.
ترامپ شۇ كۈنى ئەتىگەن ئايروپىلاندىن چۈشكەندىن كېيىن، ئارىسىدا مۇئاۋىن باش مىنىستىر سىمون ھاررىس، تاشقى ئىشلار مىنىستىرى ھېلېن مەكئېنتى ۋە ئامېرىكانىڭ ئىرېلاندىيەدىكى باش ئەلچىسى ئېد ۋولشمۇ بولغان يۇقىرى دەرىجىلىك ئىرېلاندىيە ئەمەلدارلىرى تەرىپىدىن كۈتۈۋېلىندى.
ئىككى كۈنلۈك زىيارىتى دائىرىسىدە، ترامپنىڭ دۇبلىندىكى فىنكىس باغچىسىغا جايلاشقان ئامېرىكا باش ئەلچىخانىسى قارارگاھىدا ئۇيۇشتۇرۇلىدىغان پائالىيەتلەرگە قاتنىشىشىمۇ پىلانلانغان ئىدى.
ترامپ ئاندىن دۆلەتنىڭ غەربىدىكى كلارې رايونىغا بېرىپ، ئۆزىگە تەۋە بولغان مېھمانخانىدا ئۆتكۈزۈلىدىغان «Amgen Irish Open» گولف توپ مۇسابىقىسىگە قاتنىشىدۇ.
ترامپنىڭ دۇبلىندىن ئىرېلاندىيەنىڭ غەربىي قىرغىقىغىچە سوزۇلغان زىيارەت كۈنتەرتىپىدىن كېيىن، يەكشەنبە كۈنى دۆلەتتىن ئايرىلىشى پىلانلاندى.
