تۈركىيە تاشقى ئىشلار مىنىستىرلىقى، قىرىمنىڭ بېسىۋېلىنىشىدىن كېيىن قىرىم تاتارلىرى چەككەن ئازابلارنىڭ تېخىمۇ چوڭقۇرلاشقانلىقىنى ئەسكەرتىپ، چېركەس سۈرگۈنىدە ھاياتىدىن ئايرىلغانلارنى ھۆرمەت ۋە رەھمەت بىلەن ئەسلىدى.
تۈركىيە دۈشەنبە كۈنى قىرىم تاتارلىرى ۋە چېركەس سۈرگۈنلىرىنىڭ خاتىرە كۈنلىرىنى ئەسلەش ئۈچۈن ئېلان قىلغان باياناتىدا، ھەر ئىككى ۋەقەنى «چوڭ ئىنسانىي پاجىئە» دەپ سۈپەتلىدى ۋە قىرىم تاتار خەلقىگە بولغان قوللىشىنى يەنە بىر قېتىم جەزملەشتۈردى.
تاشقى ئىشلار مىنىستىرلىقى قىرىم تاتارلىرىنىڭ 1944-يىلىدىكى سۈرگۈن قىلىنىشىنىڭ 82 - يىللىقى ۋە چېركەس سۈرگۈنىنىڭ 162 - يىللىقىنى ئەسلەش ئۈچۈن بايانات ئېلان قىلىپ، يۈز مىڭلىغان قىرىم تاتارلىرىنىڭ ئۆز ماكانلىرىدىن تۈرلۈك دۆلەتلەردىكى ئەمگەك لاگېرلىرىغا مەجبۇرىي سۈرگۈن قىلىنغانلىقىنى ۋە نۇرغۇنلىرىنىڭ ئېغىر شارائىتلار ئاستىدا ھاياتىدىن ئايرىلغانلىقىنى بىلدۈردى. مىنىستىرلىق قىرىمنىڭ يەرلىك خەلقى بولغان قىرىم تاتارلىرىنىڭ ئۇزۇن يىللارغىچە قىرىم يېرىم ئارىلىغا قايتىشىنىڭ توسقۇنلۇققا ئۇچرىغانلىقىنى ئېيتتى.
بۇنىڭدىن باشقا، قىرىم تاتارلىرى چەككەن ئازابلارنىڭ «يېرىم ئارالنىڭ قانۇنسىز بېسىۋېلىنىشى» دىن كېيىن تېخىمۇ ئېغىرلاشقانلىقى تەكىتلەندى. مىنىستىرلىق: «تۈركىيە، قىرىم تاتارلىرىنىڭ مىللىي كىملىكى، تىلى ۋە مەدەنىيىتىنىڭ قوغدىلىشى، شۇنداقلا ئۇلارنىڭ بىخەتەرلىكى ۋە پاراۋانلىقىنىڭ تەمىنلىنىشىگە قارىتىلغان قوللىشىنى داۋاملاشتۇرىدۇ» دېدى.
مىنىستىرلىق 1864-يىلىدىكى چېركەس سۈرگۈنىگە ئىشارەت قىلىپ، كاۋكاز خەلقلىرىنى ئىنتايىن ئېغىر شارائىتلار ئاستىدا ۋەتىنىدىن ئايرىلىشقا مەجبۇرلىغان، چوڭ ئازابلار ۋە ئۆلۈملەرگە سەۋەب بولغان بۇ ۋەقەنى «چوڭ ئىنسانىي پاجىئە» دەپ ئاتىدى. مىنىستىرلىق سۆزىگە: «قىرىم تاتارلىرىنىڭ ۋە كاۋكازنىڭ قېرىنداش خەلقلىرىنىڭ ئازابىنى ئورتاقلىشىمىز، ھاياتىدىن ئايرىلغانلارنى ھۆرمەت ۋە رەھمەت بىلەن ئەسلەيمىز» دەپ قوشۇمچە قىلدى.
