سۈرىيە دۆلەت مۇداپىئە مىنىستىرى مۇرفاف ئەبۇ كاسرا تۈركىيە دۆلەت مۇداپىئە سانائىتى ئىدارىسى باشلىقى ھالۇك گۆرگۈن ۋە ئۇنىڭ ھەمراھلىقىدىكى ۋەكىللەر ئۆمىكى بىلەن شەنبە كۈنى شامدا كۆرۈشتى.
سۈرىيە دۆلەت مۇداپىئە مىنىستىرلىقىنىڭ تېلېگرام قانىلىدا ھەمبەھىرلەنگەن باياناتقا قارىغاندا، تەرەپلەر بىر قاتار ئورتاق مەسىلىلەرنى مۇزاكىرە قىلغان ۋە دۆلەت مۇداپىئە ساھەسىدىكى ھەمكارلىقنى تەرەققىي قىلدۇرۇش يوللىرى ئۈستىدە سۆزلەشكەن.
بۇ ئۇچرىشىش تۈركىيە تاشقى ئىشلار مىنىستىرلىقىنىڭ باياناتىغا ئاساسلانغاندا، 12-ئۆكتەبىر كۈنى ئەنقەرەدە ئۆتكۈزۈلۈشى پىلانلانغان يۇقىرى دەرىجىلىك يىغىندىن ئىلگىرى ئېلىپ بېرىلغان.
يىغىننىڭ كۈن تەرتىپىدە بىخەتەرلىك ھەمكارلىقى ۋە رايوندىكى ئەڭ يېڭى ئۆزگىرىشلەرنىڭ ئالدىنقى ئورۇندا تۇرۇشى كۈتۈلمەكتە.
بۇ يىغىندا تۈركىيەگە تاشقى ئىشلار مىنىستىرى خاقان فىدان، دۆلەت مۇداپىئە مىنىستىرى ياشار گۈلەر ۋە مىللىي ئىستىخبارات ئىدارىسى باشلىقى ئىبراھىم كالىن ۋەكىللىك قىلىدۇ.
ئىلگىرى، 8-ئۆكتەبىر كۈنى ئەنقەرەدە ئۆتكۈزۈلگەن ئورتاق ئاخبارات ئېلان قىلىش يىغىنىدا، خاقان فىدان سۈرىيەلىك مەنسەپدىشى ئەسەد ھەسەن ئەل شائىبانى بىلەن ئۆتكۈزگەن سۆھبىتىدە، سۈرىيەدىكى ئەڭ يېڭى سايلام، ئىككى تەرەپلىك مۇناسىۋەتلەر ۋە رايونلۇق ئۆزگىرىشلەر ھەققىدە «كەڭ دائىرىلىك ۋە ئوچۇق-يورۇق سۆھبەتلەرنى» ئېلىپ بارغانلىقىنى بىلدۈرگەن ئىدى.
تۈركىيە تاشقى ئىشلار مىنىستىرى يەنە سۈرىيە ھۆكۈمىتىنىڭ تېرورلۇققا قارشى تۇرۇش مەسىلىسىدە ئىرادىسىنى نامايان قىلغانلىقىنى بىلدۈرۈپ، ھازىرقى ۋەزىيەتنى «ئەسەد ھاكىمىيىتى دەۋرىدە ھەل قىلغىلى بولمىغان بىخەتەرلىك مەسىلىلىرىنى بىر تەرەپ قىلىش ئۈچۈن زور بىر پۇرسەت» دەپ تەرىپلىدى.
