يەرلىك ئاخبارات ۋاسىتىلىرى تارقاتقان ۋىدېيو كۆرۈنۈشلىرىدە، ئىيوردان دەرياسىنىڭ غەربىي قىرغىقىدا ئونلىغان پەلەستىنلىكنىڭ ئىسرائىلىيە ئارمىيەسى جامەگە ئاتقان ياش ئاققۇزۇش بومبىسىدىن زىيان كۆرگەنلىكى ئاشكارىلاندى. جامەدە شام نامىزى ئوقۇلۇۋاتقان پەيتتە ئېتىلغان گاز بومبىسى سەۋەبىدىن، نامازخانلارنىڭ بىر قىسمى يۆتەلگەن ۋە كۆزلىرىنى تۇتقان ھالدا سىرتقا قېچىپ چىققان، بىر قىسمى بولسا نامىزىنى داۋاملاشتۇرۇشقا تىرىشقان. مەزكۇر ۋەقەدە جامە ئىچىدىكى ئىككى نەپەر ياشانغان پەلەستىنلىك تۇنجۇقۇپ قېلىش خەۋپىگە دۇچ كەلگەن. پەلەستىن تەرەپ ئىسرائىلىيەنىڭ بۇ قىلمىشىنى ئىبادەت ئەركىنلىكىگە قىلىنغان بىر ھۇجۇم دەپ ئەيىبلىدى.