تۈركىيە دۆلەت مۇداپىئە تېخنىكىلىرى، ئىنژېنېرلىق ۋە سودا پاي چەكلىك شىركىتى (STM) تەرىپىدىن پورتۇگالىيە دېڭىز ئارمىيەسى ئۈچۈن ياسىلىۋاتقان مەزكۇر تۈردىكى ئىككىنچى پاراخوت — «N.R.P. D. Dinis» (A5212) نىڭ ئىستانبۇلدا مېتال تاختاي كېسىش مۇراسىمى ئۆتكۈزۈلۈپ، ئىشلەپچىقىرىش مۇساپىسى رەسمىي باشلاندى.
پورتۇگالىيەنىڭ لوگىستىكىلىق قوللاش پاراخوتى سېتىۋېلىش خېرىدار چاقىرىش تۈرىدە ئۇتۇپ چىققان «STM» شىركىتى، مەزكۇر قۇرۇلۇش كېلىشىمىنى 2024-يىلى دېكابىردا پايتەخت لىسبوندا ئىمزالىغان ئىدى. تۇنجى پاراخوتنىڭ قۇرۇلۇشى 2025-يىلى نويابىردا مېتال تاختاي كېسىش بىلەن باشلىنىپ، 2026-يىلى يانۋاردا پاراخوت ياساش سۇپىسىغا قويۇلغانىدى. نۆۋەتتە تۇنجى پاراخوتن ياساش خىزمەتلىرى داۋاملىشىۋاتقان بىر پەيتتە، مەزكۇر تۈردىكى ئىككىنچى پاراخوتنىڭ ئىشلەپچىقىرىلىشىغىمۇ ئۆتۈلدى.
«STM» شىركىتىنىڭ مۇئاۋىن باش مۇدىرى بۈلەنت سويدال (Bülent Soydal) ناتو ئۆلچەملىرىگە ئاساسەن تەرەققىي قىلدۇرۇلغان دېڭىز سۇپىلىرى ساھەسىدىكى تەجرىبىلىرىنى پورتۇگالىيەگە يەتكۈزگەنلىكىنى بىلدۈرۈپ، ھەر ئىككى پاراخوتنىڭ 2027-يىلى سۇغا چۈشۈرۈلۈشىنى ۋە 2028-يىلى پورتۇگالىيە دېڭىز ئارمىيەسىگە رەسمىي تاپشۇرۇپ بېرىلىشىنى نىشان قىلىۋاتقانلىقىنى ئېيتتى.
ئىستانبۇلدىكى «ADA» (ئادا) كېمەسازلىق زاۋۇتىدا ياسىلىۋاتقان بۇ پاراخوتلار لوگىستىكىلىق قوللاش، دېڭىزدا يېقىلغۇ ۋە يۈك توشۇش ۋەزىپىلىرىدىن سىرت، سۇ ۋە قۇرۇقلۇق قىسىملىرىنىڭ بىرلىشىپ ئېلىپ بارىدىغان ئامفىبىيە ھەرىكەتلىرى ۋە بىرلەشمە قىسىملارنى يۆتكەش پائالىيەتلىرىدىمۇ ئىشلىتىلىدۇ. بۇ سۇپىلار 20 گىچە يېنىك تىپتىكى تاكتىكىلىق ساۋۇتلۇق ئاپتوموبىل توشۇيالايدىغان بولۇپ، ئىنسانپەرۋەرلىك ياردىمى، ئىزدەش-قۇتقۇزۇش ۋە داۋالاش ياردىمى ھەرىكەتلىرىدىمۇ ۋەزىپە ئۆتەيدۇ.
ئۇزۇنلۇقى 137 مېتىر، سۇ كۆچۈرۈش مىقدارى 11 مىڭ توننا كېلىدىغان بۇ پاراخوتلار سائىتىگە 18 دېڭىز مىلىدىن يۇقىرى سۈرئەتكە يېتەلەيدۇ ۋە 30 كۈن بويىچە دېڭىزدا ئۈزلۈكسىز ۋەزىپە ئۆتەلەيدۇ. يېقىن مۇساپىلىق ھاۋا مۇداپىئە سىستېمىلىرى، يىراقتىن كونترول قىلىنىدىغان قوراللار، ئىلغار سېنزورلار ۋە ئېلېكترونلۇق ئالداش سىستېمىلىرى سەپلەنگەن بۇ سۇپىلاردا يەنە تىك ئۇچار ۋە ئۇچقۇچىسىز ئايروپىلانلار ئۈچۈن مەخسۇس ئۇچۇش پالۇبىسى ھەمدە ئايروپىلان ئىسكىلاتى بولىدۇ. بۇ پاراخوتلار 100 نەپەر ۋەزىپە خادىمىدىن سىرت يەنە 100 كىشىلىك قوشۇمچە خادىم سىغدۇرۇش ئىقتىدارىغا ئىگە.
