تۈركىيە جۇمھۇرىيىتى جۇمھۇر رەئىسى رەجەپ تاييىپ ئەردوغان غەززەدىكى ئىسرائىلىيە ئىرقىي قىرغىنچىلىقىنى توختىتىدىغان ھەر قانداق پىلاننى قوللايدىغانلىقىنى بىلدۈردى.
تۈركىيەنىڭ شىمالىي قىرغىقىدىكى رىزە شەھىرىدە سۆز قىلغان جۇمھۇر رەئىس ئەردوغان: «غەززەدە ئىككى يىلدىن بۇيان داۋاملىشىۋاتقان قەتلىئام ۋە ئىرقىي قىرغىنچىلىقنى مەڭگۈلۈك توختىتىدىغان ھەر بىر پىلاننى تولۇق قوللايمىز. تۈركىيە غەززەدىكى ئۇرۇش توختىتىش كېلىشىمىنى ئىشقا ئاشۇرۇش جەريانىدا پىرىنسىپلىق ۋە ئادىل مەيداندا تۇردى» دېگەنلەرنى بىلدۈردى.
ئەردوغان تۈركىيەنىڭ ئىسرائىلىيە بىلەن ھاماس ئوتتۇرىسىدا ھاسىل قىلىنغان يېڭى ئۇرۇش توختىتىش كېلىشىمىنىڭ غەززە ۋە باشقا پەلەستىن زېمىنلىرىدا مەڭگۈلۈك تىنچلىق، خاتىرجەملىك ۋە بىخەتەرلىككە ئېلىپ كېلىشىنى ئۈمىد قىلىدىغانلىقىنى تەكىتلىدى.
ئەردوغان: «پەلەستىنلىك قېرىنداشلىرىمىز، بولۇپمۇ ھاماس، تىنچلىققا تەييار ئىكەنلىكىنى كۆرسەتتى» دېدى.
جۇمھۇر رەئىس: «ئەمدى ئىسرائىلىيە ھۆكۈمىتى بۇ كېلىشىمنىڭ شەرتلىرىگە ئەمەل قىلىشى كېرەك» دېگەن سۆزلىرى بىلەن، ئىسرائىلىيەنى ئۆزى ئىمزالىغان غەززە ئۇرۇش توختىتىش كېلىشىمىگە ئەمەل قىلىشقا ۋە رايوننىڭ ھەمدە ئۇ يەردىكى خەلقنىڭ بىخەتەرلىكىگە تەھدىت ئېلىپ كېلىۋاتقان تاجاۋۇزچىلىق سىياسەتلىرىنى ئاخىرلاشتۇرۇشقا چاقىردى.
