ئىسرائىلىيە ئارمىيەسى لىۋاننىڭ جەنۇبىدىكى يېزا-بازارلارغا قارىتا ئېلىپ بېرىۋاتقان ھاۋا ھۇجۇملىرىنى توختاتمىدى. لىۋان دۆلەتلىك خەۋەر ئاگېنتلىقى (NNA) نىڭ خەۋىرىگە قارىغاندا، ئىسرائىلىيە ئۇرۇش ئايروپىلانلىرى لىۋاننىڭ جەنۇبىدىكى ھانىن ۋە كانتارا يېزىلىرىنى بومباردىمان قىلغان.

ئىسرائىلىيە ئۇرۇش ئايروپىلانلىرى يەنە شەرقىي زاۋتار بىلەن يۇقىرى نەباتىيە يېزىلىرى ئوتتۇرىسىدىكى ئەين ئەسسەماھىيە رايونىنى نىشان قىلغان. سۇر شەھىرىگە قاراشلىق مەنسۇرى يېزىسىدىكى بىر قىسىم ئۆيلەرمۇ ھاۋا ھۇجۇمىغا ئۇچرىغان.

ھانىن يېزىسىغا قىلىنغان يەنە بىر ھاۋا ھۇجۇمىدا، بىرلەشكەن دۆلەتلەر تەشكىلاتىنىڭ لىۋاندا تۇرۇشلۇق ۋاقىتلىق تىنچلىق ساقلاش قىسمى (UNIFIL) پۇنكىتنىڭ ئەتراپى نىشانغا ئېلىنغان. يەنە بىر تەرەپتىن، ئىسرائىلىيە ئارمىيەسى كەفرتەبنىت يېزىسىدىكى «شېھىت مەھمۇد فاقىھ دۆلەتلىك مەكتىپى» نىڭ بىناسىنى پارتلاتقۇچلار بىلەن پۈتۈنلەي ۋەيران قىلغان.

ئىسرائىلىيە ئارمىيەسى 2-مارتتىن باشلاپ لىۋانغا قارىتا كەڭ كۆلەملىك ھاۋا ھۇجۇمىنى قوزغاپ، دۆلەتنىڭ جەنۇبىدىكى ئونلىغان يېزا-بازارنى بېسىۋالغان ئىدى. لىۋان ھۆكۈمىتى بۇ جەرياندا ئۆي-ماكانلىرىدىن ئايرىلىپ قالغانلار سانىنىڭ 1 مىليوندىن ئېشىپ كەتكەنلىكىنى ئېلان قىلغان ئىدى.

لىۋان بىلەن ئىسرائىلىيە ئوتتۇرىسىدا 17-ئاپرېلدىن باشلاپ يولغا قويۇلغان ئۇرۇش توختىتىش كېلىشىمىنىڭ مۇددىتى كېيىنچە بىرنەچچە قېتىم ئۇزارتىلغان ئىدى. لىۋان سەھىيە مىنىستىرلىقىنىڭ ئەڭ ئاخىرقى باياناتىدا بىلدۈرۈلۈشىچە، ئىسرائىلىيەنىڭ 2-مارتتىن بۇيانقى ھۇجۇملىرىدا كەم دېگەندە 4 مىڭ 383 كىشى ھاياتىدىن ئايرىلغان.

ۋاشىنگتوندا ئىسرائىلىيە بىلەن لىۋان ئوتتۇرىسىدا ئۆتكۈزۈلگەن بىۋاسىتە سۆھبەتلەرنىڭ 5-نۆۋەتلىك يىغىنىدىن كېيىن، 26-ئىيۇن كۈنى ئىككى دۆلەت ئوتتۇرىسىدا رامكا كېلىشىمى ئىمزالانغان ئىدى.