فاھرەتتىن ئالتۇن «‹TRT World› مۇنبىرى» يىغىنىدا قىلغان سۆزىدە، ئاخبارات ۋاسىتىلىرىنىڭ نۆۋەتتە پەقەت سىياسىي ۋە ئىدىيەۋى قۇتۇپلىشىشلارنىڭلا ئەمەس، ئىجتىمائىي قۇتۇپلىشىشلارنىڭمۇ مەنبەسى بولۇشقا باشلىغانلىقىنى ئەسكەرتتى، ھەمدە ئىسلام دۈشمەنلىكى ۋە چەت ئەللىكلەرگە ئۆچمەنلىك تەشۋىقاتىنىڭ ناتوغرا ئېقىمى بولۇشتىن ھالقىپ، ئاساسلىق ئاخبارات ۋاستىلىرى ئورگانلىرىنىڭ تەشۋىقات ئېقىمىغا ئايلىنىپ قالغانلىقىنى قەيت قىلدى.
ئالتۇن بۇگۈنكى كۈندە كۆز ئالدىمىزدا غەززەدە دەھشەتلىك بىر ئىرقىي قىرغىنچىلىقنىڭ يۈز بېرىۋاتقانلىقىنى تەكىتلەپ مۇنداق دېدى:
«گەرچە بۇ ئىرقىي قىرغىنچىلىق پۈتكۈل دۇنيانىڭ كۆز ئالدىدا يۈز بېرىۋاتقان بولسىمۇ، تولىمۇ ئەپسۇسكى، غەرب ئاخبارات ۋاسىتىلىرى ئىسرائىلىيەنىڭ غەرب دۇنياسى ئۈچۈن قانچىلىك مۇھىم ئىتتىپاقدىشى ئىكەنلىكىنىڭ تەشۋىقاتىنى قىلىۋاتىدۇ. سىياسىي جەھەتتىن توغرا بىر تىل ئىشلىتىش زۆرۈرىيىتىنى ھېس قىلماي، ئىسرائىلىيەنى ھەقلىق چىقىرىش ئۈچۈن قولىدىن كەلگەننى قىلىۋاتىدۇ. پەقەت غەززەلىكلەر، پەلەستىنلىكلەرگىلا ئەمەس، پۈتكۈل مۇسۇلمانلارغا قارشى ئوچۇق-ئاشكارا ھالدا نەپرەت تەشۋىقاتلىرىنى تارقىتىۋاتىدۇ».
ئۇ، ئاخبارات ۋاسىتىلىرىنىڭ كومپاسىنىڭ ئادالەت ۋە ھەقىقەتنى ياقىلاش بولۇشى كېرەكلىكىنى تەكىتلەپ مۇنداق دېدى:
«بۈگۈنكى كۈندە غەززەدىكى ئىرقىي قىرغىنچىلىقنى ئۆز ئىچىگە ئالغان پۈتكۈل دۇنيادا يۈز بېرىۋاتقان ئىنسانىيەتكە قارشى جىنايەتلەر، ئۇرۇشلار، تېررورلۇق ھەرىكەتلىرى، تەرتىپسىز كۆچمەنلەر دولقۇنى، ئىقتىسادىي بوھرانلار، ئوزۇق-تۈلۈك ۋە تەمىنلەش زەنجىرلىرى كىرىزىسلىرىنىڭ ئالدىدا ئاخبارات ۋاسىتىلىرى ‹ھەقلىق› نى ياقىلاش ئەمەس، ‹كۈچلۈك› نىڭ تەشۋىقاتچىلىقىنى قىلماقتا، بۇ تەرتىپ چوقۇم ئۆزگىرىشى كېرەك.»
